ភ្នំពេញ ៖ នៅពេលនិយាយទៅដល់ តារាកំប្លែងស្រីដែលមានភាពក្រមិចក្រមើម និងសម្តីសំដៅចាក់ទឹកមិនលេចនោះ គឺអ្នកនាង លន់ ដាណេ ប្រហែលបងប្អូនប្រិយមិត្តបានស្គាល់ហើយ ដោយស្រីស្រស់រូបនេះ កាន់តែលេចធ្លោបន្ថែមទៀត ក្រោយពេលអ្នកនាងកែសម្ជស្ស ធ្វើអោយតារាស្រីរូបនេះ កាន់តែក្មេងជាងវ័យ និងមានបុរសៗជាច្រើនឆោមរោមសុំស្នេហ៍។
ប្រាកដណាស់ កាលពីពេលថ្មីៗនេះ តារាកំប្លែងអ្នកនាង ដាណេ បានបង្ហោះរូបភាពស្និទ្ធស្នាលជាមួយតារា Tik Tok ម្នាក់ ដោយបង្ហោះសារ និងភាពល្អូកល្អិនជាមួយគ្នាតាមបណ្តាញសង្គមខុសពីធម្មតា ពោលគឺធ្វើអោយមហាជនជាច្រើនដាក់ការសង្ស័យថា តារារូបនេះ កំពុងតែបង្កាត់ភ្លើងស្នេហ៍ និងមានទំនាក់ទំនងស្នេហាជាមួយតារា Tik Tok មួយរូបនេះហើយ។
តាមរយៈបទសម្ភាសន៍ជាមួយសារព័ត៌មានសន្តិភាព ដោយអ្នកនាង លន់ ដាណេ ធ្វើការរៀនរាប់ថា មិនខ្វះឡើយអ្នកតាមសុំស្នេហ៍ សុំស្រឡាញ់ ចង់បានលេខទូរស័ព្ទ ពោលគឺរឿងស្នេហានេះ អ្នកនាងសុំគិតមើលអោយយូរសិន ព្រោះសព្វថ្ងៃ អ្នកនាងហាក់មមាញឹកជាមួយការងារសិល្បៈ តែអ្នកនាងក៏មិនបដិសេដចំពោះរឿងស្នេហានោះដែរ ប្រសិនបើមានមនុស្សប្រុសដែលអ្នកនាងត្រូវចិត្ត អ្នកនាងនឹងទទួលយកស្នេហា ពោលគឺជីវិតមនុស្សម្នាក់កើតមករមែងតែមានគូរ។
អ្នកនាងថា បើទាក់ទងជាមួយនឹងទំនាក់ទំនងជាមួយលោក ខៃ មករា ដែលជាតារា Tik Tok ដ៏មានប្រជាប្រិយភាពនោះ អ្នកនាងសុំធ្វើការលាក់ទំនាក់ទំនងសិន ដោយអ្នកនាង សុំមិនធ្វើការបកស្រាយទេ ហើយអ្នកនាងអាចត្រឹមជម្រាបជូនថា គ្រាន់តែជាដៃគូរកស៊ីជាមួយគ្នា។ បើនិយាយដល់រឿងស្នេហាប្រហែលសុំគិតមើលសិន។
បើនិយាយដល់ការកែសម្ជស្សវិញ អ្នកនាងនិយាយថា ក្រោយការកែសម្រស់របស់អ្នកនាងក្មេងជាងវ័យតែម្តង ដោយមិត្តសិល្បៈជាច្រើនបានសរសើរ ជាពិសេសក្រោយកែរួច តារាស្រីរូបនេះ កាន់តែមានយីអ៊ុនក្រឺតៗជាមួយការងារសិល្បៈ និងការរកស៊ីរបស់ខ្លួន។ បើទោះបីជា មមាញឹកជាមួយការងាររកស៊ីយ៉ាងណា ក៏អ្នកនាងនៅតែបោះជើងលើវិថីនេះ ព្រោះសិល្បៈជាឆ្នាំងបាយរបស់អ្នកនាង ហើយអ្នកនាងមានកេរ្តិ៍ និងភាពមានបានក៏ដោយសារសិល្បៈនេះដែរ។
គួររំម្លឹកផងដែរថា អ្នកនាង លន់ ដាណេ ចាប់អាជីពសិល្បៈដំបូងនៅឆ្នាំ២០០៥ ជាតារាចម្រៀង និងជាតារាសម្តែង លុះក្រោយមកឆ្នាំ២០០៦ អ្នកនាងក៏ក្លាយជាតារាកំប្លែង និងចាប់យកអាជីពមួយនេះ ដោយតែងតែសម្តែងជាមួយតារាកំប្លែងចាស់វស្សានាយក្រឹម រហូតមកដល់បច្ចុប្បន្ននេះ។ ជាចុងក្រោយ អ្នកនាងពិតជាអគុណខ្លាំងចំពោះការគាំទ្រ ជាពិសេសរឿងទំនាក់ស្នេហានេះតែម្តង ដែលបងប្អូនមហាជនតែងតែបារម្ភ និងសួរនាំ ដោយអ្នកនាងចង់ប្រាប់ទៅមហាជនថា គ្រាន់តែជាការស៊ីជាមួយគ្នាតែប៉ុណ្ណោះ
