ភ្នំពេញ ៖ ថ្មីៗនេះ ចំថ្ងៃនៃទិវាសិទ្ធិនារីអន្តរជាតិ មានការរៀបចំឡើងយ៉ាងសន្ធឹកសន្ធាប់នូវកម្មវិធីប្រគំតន្ត្រីមួយយ៉ាងធំសម្បើមស្ទើរមិនគួរអោយជឿ នោះគឺ «ខួប៣ឆ្នាំ លេខពិសេសផ្ទាល់ខ្លួន» ដោយមានតារាចម្រៀងល្បីៗឈ្មោះចូលរួមជាច្រើនដួងទាំងប្រុសទាំងស្រី។ តែអ្វីដែលធ្វើឱ្យអ្នករាល់គ្នានឹកស្មានមិនដល់នោះ ដោយនៅក្នុងព្រឹត្តិការណ៍មួយនឹងផងដែរ ក៏មានវត្តមានកំពូលតារាចម្រៀងស្រីដែលមានកេរ្តិ៍ឈ្មោះល្បីល្បាញប្រចាំផលិតកម្មរស្មីហង្សមាស គឺអ្នកនាង ឱក សុគន្ធកញ្ញា និងជាពិសេសក៏មានវត្តមានរបស់តារាចម្រៀងប្រុសរ៉េបវ័យក្មេង លោក វណ្ណដា ដែលបានលេចវត្តមាននៅក្នុងកម្មវិធីនោះផងដែរ។
ហើយរឹតតែជាពិសេសជាងនេះទៅទៀតនោះ អ្នកទាំងពីរថែមទាំងបានឡើងច្រៀងបកស្រាយនៅបទចម្រៀងរួមគ្នាលើឆាកថែមទៀតផង។ មិនតែប៉ុណ្ណោះ តារាប្រុសលោក វណ្ណដា ថែមទាំងបានលុតជង្គង់ជូនបាច់ផ្កាដល់រៀមច្បងប្រកបដោយទឹកមុខញញឹមប្រិមប្រិយលាយលំជាមួយនឹងក្ដីគោរពសប្បាយរីករាយ ហើយថែមទាំងបានពោលពាក្យប៉ុន្មានម៉ាត់ទាំងនេះថា «ចុះខ្ញុំជាហ្វេនគាត់ដែរ ដែលខ្ញុំជូនផ្កាគាត់ តើខ្ញុំមានអារម្មណ៍ម៉េចទៅ? សំខាន់ ខ្ញុំបានឱបគាត់ ក្លិនទឹកអប់នៅជាប់ខ្លួនខ្ញុំ It’s okay»។
បន្ទាប់ពីបានលឺដូច្នេះរួចមក រហូតទប់ចិត្តមិនជាប់ក៏បានធ្វើអោយតារាចម្រៀងអ្នកនាង ឱក សុគន្ធកញ្ញា រំភើបខ្លាំងពេក រហូតនិយាយមិនចេញ។ ភ្លាមៗនោះ អ្នកនាងក៏បានឆ្លើយតបទៅវិញថា «បងប្អូនជួយនិយាយពីអារម្មណ៍ខ្ញុំបន្តិចបានអត់? ពេលនេះក្នុងនាមជាហ្វេនម្នាក់ មានអារម្មណ៍យ៉ាងណាដែរ? សប្បាយចិត្តអត់? ផ្កាមួយទងនេះ ប្រហែលជាយកទៅត្រូវវា.យដាក់កញ្ចក់ ហើយតាំងទុកដាក់លើទូមួយជីវិតតែម្តង»។
គ្រាន់តែបានឃើញដូច្នេះរួចមក ក៏ឃើញថា មានពុកម៉ែបងប្អូនមិនតិចនាក់នោះឡើយ បាននាំគ្នាយកទៅបង្ហោះជាវីដេអូនៅក្នុងបណ្ដាញសង្គមហ្វេសប៊ុក និងក្នុង Tik Tok ជាហូរហែយ៉ាងភ្លូកទឹកភ្លូកដីតែម្ដង។ ហើយក៏បាននាំគ្នាចូលទៅខមិនគ្រប់ៗគ្នាថា «ឥទ្ធិពលអ្នកគាំទ្រ និងស្រឡាញ់ពេញចិត្តរបស់បងទាំងពីរនាក់ i love you b Vanda and B kanha» «ពួកគាត់ស្រឡាញ់គ្នាណាស់ ឲ្យតែជួបគ្នាដឹងតែសប្បាយ»។
អ្នកខ្លះទៀតបញ្ចេញមតិថា «អាចទេ ពួកគាត់ចេញមួយបទរួមគ្នា បងកញ្ញាសម្លេងផ្អែមមានមនោសញ្ចេតនា ហើយ វណ្ណដា រ៉េបបែបឈឺចាប់ធ្ងន់ៗ» «ក្នុងនាមជាហ្វេនបងទាំងពីរ ពេលខ្ញុំឃើញចឹង តើមានអារម្មណ៍ម៉េចទៅ?» «គួរអោយស្រលាញ់ខ្លាំងណាស់លោកអើយ នេះបានហៅថា ធ្វើជា Idol របស់ខ្ញុំមិនខុសពិតមែន» «ហ្វេនម្នាក់នេះរំភើបស្ទើរហោះទៅហើយបងទាំងពីរអើយ អីក៏ល្អយ៉ាងនេះ បងវណ្ណដា ចេះគោរពរៀមច្បងអញ្ចឹង ទើបសាកសមជាកំពូលតារារ៉េបនៅក្នុងប្រទេសកម្ពុជា»។ មួយចំនួនទៀតក៏បានខមិនលេងសើចថា «ម៉ាក់ៗស្រួលបួលតិច កុំលេងសើចជាមួយផ្លូវអារមណ្មរ៍អាយដលតូចខ្ញុំណា»៕ កោះសន្តិភាព
