ភ្នំពេញ៖ តារាចម្រៀងដែលមានមុខមាត់ស្រស់សង្ហា សយ រតនៈ និងតារាចម្រៀងកូនកាត់ចិន ប៉ាច គីមមួយ ដែលបងប្អូនមហាជនធ្លាប់បានដឹងរួមមកហើយ ដោយកាលពីពេលកន្លងទៅ តារាចម្រៀងទាំងពីរដួងនេះបានភ្ជាប់ជាមួយគ្នា ហើយគេក៏ឃើញមានវត្តមានមិត្តភក្តិ បងប្អូន ជាពិសេសតារាចម្រៀងរួមអាជីព និងតារាសម្តែងជាច្រើនផងដែរ។
ប្រាកដណាស់ ក្រោយការភ្ជាប់ពាក្យមិនបានប៉ុន្មានផង ស្រាប់តែគូស្នេហ៍មួយគូនេះបានទម្លាយរូបភាពផ្អែមល្ហែមជាបន្តបន្ទាប់ ហើយអ្វីដែលមហាជនតែងតែគត់សម្គាល់នោះ គឺគូស្នេហ៍ថ្មីថ្មោងមួយគូនេះ ជាញឹកញាប់បណ្តើរគ្នាសឹងតែគ្រប់ពេលវេលា ដោយធ្វើអោយអ្នកគាំទ្រច្រណែននឹងភាពផ្អែមល្ហែមរបស់តារាដ៏ស្រស់សោភាមួយគូនេះ។
កាលពីពេលថ្មីៗនេះ តារាចម្រៀងដែលមានមុខមាត់ស្រស់សង្ហាលោក សយ រតនៈ បានបង្ហោះរូបភាពជាមួយរថយន្តពណ៌ខ្មៅដ៏ទំនើបមួយគ្រឿង ដោយធ្វើអោយអ្នកគាំទ្រមានការងឿងឆ្ងល់ជាខ្លាំងថា តើរថយន្តមួយគ្រឿងនេះ លោក សយ រតនៈ ទិញអោយកញ្ញា ប៉ាច គីមមួយឬ? និងអ្នកគាំទ្រខ្លះទៀតបាននិយាយថា កញ្ញា ប៉ាច គីមមួយ ពិតជាសំណាង ព្រោះភ្ជាប់ពាក្យមិនបានប៉ុន្មានផង ស្រាប់តែលោក សយ រតនៈ ទិញរថយន្តទំនើបអោយជិះដូច្នេះ។
តាមរយៈបទសម្ភាសន៍ជាមួយសារព័ត៌មានកោះសន្តិភាព តារាចម្រៀងមុខមានមន្តស្នេហ៍លោក សយ រតនៈ បានចេញមកបញ្ជាក់ច្បាស់ៗទាក់ទងជាមួយរថយន្តដែលបានទិញ ហើយលោកក៏មិនធ្វើការលាក់លៀមអ្វីជាមួយមហាជននោះដែរ។
លោក សយ រតនៈ បាននិយាយថា នេះរថយន្តដែលជាកម្លាំងញើសឈា.មរបស់លោក ជាមួយកញ្ញា ប៉ាច គីមមួយ ដែលបានខិតខំប្រឹងប្រែងជាមួយគ្នាជាច្រើនឆ្នាំ ទើបលោកសម្រេចទិញរថយន្តមួយនេះតែម្តង។ លោក រតនៈបានបន្តថា រថយន្តនេះ លោកទិញក្នុងតម្លៃ៦ម៉ឺនដុល្លារ ហើយរថយន្តមួយនេះ លោកទិញសម្រាប់ពួកលោកទាំងពីរ ហើយក៏សប្បាយចិត្តជាខ្លាំងនៅពេលដែលលោកបានធ្វើអ្វីដែលខ្លួនស្រឡាញ់ ជាពិសេសបានធ្វើអ្វីៗដែលល្អៗសម្រាប់ខ្លួនឯងដូច្នេះ។
ទាក់ទងរឿងរៀបការវិញ លោកក៏បានបង្ហើបថា លោកក៏នឹងគិតគូរអោយបានលឿនជាទីបំផុត ប៉ុន្តែពេលនេះលោកមិនបានកំណត់នៅឡើយទេ ដោយសារលោកជាមួយគូស្នេហ៍មានភាពមមាញឹកជាមួយការងារសិល្បៈ និងការងាររកស៊ីខ្លះៗ ដូច្នេះហើយទើបបានជាលោកសម្រេចចិត្តចេះតែពន្យារពេល ហើយណាមួយទៀត លោកក៏ហាក់ដូចជាកាក់កបជាមួយការរកស៊ីជាខ្លាំង។
តារាចម្រៀង លោក សយ រតនៈ ក៏បានបង្ហើបពីទំនាក់ទំនងរបស់លោក និងកញ្ញា គីមមួយខ្លះៗផងដែរ ដោយបានអោយដឹងថា លោកហើយនិង គីមមួយ បានស្គាល់គ្នា និងចាប់ផ្តើមស្រឡាញ់គ្នាតាមរយៈការប្រឡងចម្រៀង ហេតុតែជានិស្ស័យចេះតែអោយលោកនឹងកញ្ញាមានពេលវេលាជាការងាររួមគ្នា និងបណ្តាលអោយមានចិត្តលើគ្នារហូតមកដល់សព្វថ្ងៃនេះ។
តារាចម្រៀងសង្ហារូបនេះក៏បានបន្តថា ទម្រាំលោកហើយនឹងកញ្ញា គីមមួយ ឈានដល់ការភ្ជាប់ពាក្យ គឺពួកលោកមើលចិត្តគ្នាប្រហែលជា៣ទៅ៤ឆ្នាំមកហើយ ទើបលោកហ៊ានទម្លាយរឿងរ៉ាវទំនាក់ទំនងស្នេហាដ៏ផ្អែមល្ហែមមួយនេះ។ ជាចុងក្រោយ តារាចម្រៀង លោក សយ រតនៈ ក៏អរគុណសម្រាប់អ្នកគាំទ្រកន្លងមក ព្រោះមានការការគាំទ្រនេះហើយ ទើបបានលោក ហើយនឹងគូស្នេហ៍របស់លោកមានប្រជាប្រិយភាព ក៏ដូចជាភាពល្បីល្បាញរហូតមកដល់នាពេលនេះ៕
