ភ្នំពេញ ៖ ភ្លាមៗក្រោយពីមានការភ្ញាក់ផ្អើល និងមានការចែកចាយនូវព័ត៌មាននៃមរណាភភាពរបស់លោក ព្រហ្ម ម៉ាញ និងមានការចូលរួមរំលែកទុក្ខចំពោះរូបលោកនោះ សមាជិកគ្រួសាររបស់សិល្បករជើងចាស់រូបនេះ បានច្រានចោលនូវព័ត៌មានខាងលើ ដោយបញ្ជាក់អះអាងថា ស្ថានភាពល្អប្រសើរ រៀបចំចេញពីមន្ទីរពេទ្យផងដែរ ។
«ចាស អត់អីទេបង សុខភាពល្អតើបង អត់មានរឿងអីទេ គឺគាត់រៀបចំចេញពីពេទ្យតើបង» ។ នេះជាសម្តីរបស់អ្នកនាង បូដា ណែត ដែលក្មួយស្រី លោក ព្រហ្ម ម៉ាញ បានថ្លែងប្រាប់សារព័ត៌មានកោះសន្តិភាពនារសៀលថ្ងៃទី ២៤ ខែមីនា ឆ្នាំ២០២២ ដោយបន្ថែមថា «អូហ៌ គាត់កំពុងនិយាយរឿងនេះ មានគេខល (ទូរស័ព្ទ) សួរនាំរហូត ថាអ្នកណាយកទៅនិយាយអ៊ីចឹង (ថាលោកព្រហ្ម ម៉ាញ ទទួលមរណភាព) ។
«អត់យល់សោះថា គេនិយាយអ៊ីចឹង ។ សុខភាពគាត់គ្រាន់បើ ត្រៀមចេញពីពេទ្យហើយ» ។ នេះជាការបញ្ជាក់របស់អ្នកនាង បូដា ណែត។
ជាមួយគ្នានោះផងដែរ ពិធីករ និងជាតារាចម្រៀង លោក អ៊ឹម ជីវ៉ា ក៏បានអះអាងថា តារាចំរៀងអាយ៉ៃ លោកគ្រូ ព្រហ្ម ម៉ាញ «មិនបានស្លាប់ ដូចពាក្យចចារ៉ាមឡើយ គឺគាត់ កំពុងសំរាកព្យាបាលជំងឺលើសឈាមធម្មតា! នៅមន្ទីពេទ្យក្បែស្ពានអាកាសពេទ្យលោកសង្ឃ» ។ លោកបន្តថា ពេលនេះសុខភាពភាពគាត់បានធូស្រាលមួយកម្រិតហើយ គាត់អាចនិយាយបាន សូមបងប្អូនកុំជឿពត៌មានចចាមរ៉ាមអី៕
