ភ្នំពេញ ៖ ជាថ្មីម្តងទៀត តារាសម្តែងនាង ព្រីម លីហ្សា បានស្នើអោយមហាជនទទួលស្គាល់ និងទទួលយកនូវរូបភាពថ្មីៗ និងប្លែកដែលនាងតែងតែបង្ហោះតាមបណ្តាញសង្គមហ្វេសប៊ុកជាបន្តបន្ទាប់ ក្នុងមួយរយៈពេលចុងក្រោយនេះ។ តារារូបនេះ ក៏បានស្នើអោយមហាជនកុំមានការយល់ច្រឡំថា នាងកំពុងបង្ហាញនូវសម្ភារៈនិយម តែតាមពិតនាងកំពុងធ្វើរឿងមួយក្នុងន័យបង្កើនការយល់ដឹង និងអោយវិស័យដើរម៉ូតនៅកម្ពុជា មានភាពរីកចម្រើន។
ស្រីស្អាត ព្រីម លីហ្សា បានលើកឡើងតាមរយៈសារដែលបានបង្ហោះតាមហ្វេសប៊ុកការងារដែលតែងតែចង់ចែករំលែកទាក់ទងជាមួយនឹងម៉ូដសម្លៀកបំពាក់បែបប្លែកភ្នែក តែងតែបង្ហោះនៅក្នុង instagram ក៏ដូចជាសកម្មភាពផ្សេងៗនៅក្នុង story instagram គឺតែងតែចង់ឲ្យពុកម៉ែបងប្អូនទាំងអស់គ្នាយល់ច្បាស់អំពីវិស័យម៉ូដនៅក្នុងប្រទេសរបស់យើង ហើយជាពិសេសគឺបើកចិត្តព្រមទទួលយកនូវអ្វីដែលខ្ញុំតែងតែចែករំលែកទៅកាន់ពុកម៉ែបងប្អូនទាំងអស់គ្នា ទាក់ទងជាមួយនឹងវិស័យម៉ូដ អរគុណសម្រាប់ការស្រឡាញ់ និងគាំទ្រអ្វីដែលខ្ញុំ តែងតែចែករំលែកទៅកាន់ពុកម៉ែបងប្អូនទាំងអស់គ្នា។
នាងបញ្ជាក់ថា ការងារជាតារាសម្ដែងបងប្អូនប្រហែលជាអាចដឹងច្បាស់ហើយតែការងារជា Fashionista អាចនឹងមានបងប្អូនមួយចំនួនធំបានដឹង ហើយតែនៅឡើយតែបងប្អូនមួយចំនួនតូចតែប៉ុណ្ណោះ ដែលគាត់មិនទាន់ដឹងច្បាស់ថា ការងាររបស់ខ្ញុំមួយនេះ វាមានសារៈសំខាន់បំផុតនៅពេលបច្ចុប្បន្ន វិស័យម៉ូដនៅក្នុងប្រទេសរបស់យើង ដែលយើងអាចហៅថា ជាវិស័យ Fashion នោះ បច្ចុប្បន្នគឺមិនសូវមានភាពរីកចម្រើននោះទេ ហើយតួនាទីរបស់ Fashionista គឺជួយលើកស្ទួយវិស័យម៉ូដដែលយើងអាចហៅបានថា ជា Fashion ឲ្យកាន់តែមានភាពរីកចម្រើនខ្លាំងនៅក្នុងប្រទេសរបស់យើង ហើយចំណុចសំខាន់របស់ Fashionista គឺតែងតែចែករំលែកព្យាយាមធ្វើយ៉ាងណាឱ្យបងប្អូនយល់អំពីវិស័យម៉ូដ ។ ហើយម្យ៉ាងវិញទៀត រូបភាពរបស់ខ្ញុំអាចបញ្ជាក់បានថា ខ្ញុំជាអ្នកដែលស្រលាញ់ពិសីម៉ូតខ្លាំងណាស់ ហើយចង់ឲ្យវិស័យមួយនេះមានភាពរីកចម្រើនខ្លាំងពិតមែន ។
នាងថា បងប្អូនដែលមិនទាន់បានឃើញពីរូបភាពរបស់ខ្ញុំអាចចំណាយពេលវេលាបន្តិចចូលមើលរូបភាពរបស់ខ្ញុំម្ដងទៀត សុទ្ធសឹងតែជារូបភាពដែលបង្ហាញពីភាពរឹងមាំរបស់ស្ត្រីសម័យថ្មីនៅក្នុងឈុតសម្លៀកបំពាក់បែបប្លែកភ្នែក មិនមែនឲ្យតែខ្ញុំបង្ហាញពីឈុតសម្លៀកបំពាក់មានភាពសិចស៊ី គឺខ្ញុំចង់ផ្ដោតទៅលើភាពសិចស៊ីតែមួយមុខនោះទេ គឺខ្ញុំចង់ផ្ដោតទៅលើការរៀបចំសំលៀកបំពាក់បែបប្លែកភ្នែក ហើយអ្វីដែលសំខាន់វាតែងតែមានភាពស៊ិចស៊ីនៅក្នុងនោះដែរ។
នាងបន្តទៀតថា ចំណុចនេះហើយ ដែលខ្ញុំចង់ឲ្យបងប្អូនទាំងអស់គ្នាយល់ច្បាស់អំពីការងាររបស់ខ្ញុំ ហើយបើសិនជាខ្ញុំគ្រាន់តែយកលេសថា ចង់លើកស្ទួយវិស័យម៉ូដដើម្បីបង្ហាញតែភាពសិចស៊ីមែននោះ មិនមែនខ្ញុំមានម៉ូដសម្លៀកបំពាក់បែបប្លែកភ្នែកខ្លាំងដែរ តែងតែចែករំលែកអោយបងប្អូនទាំងអស់គ្នាបានឃើញនោះទេ សូមចូលរួមលើកស្ទួយវិស័យម៉ូដនៅក្នុងប្រទេសរបស់យើងដោយការជួយគាំទ្ររាល់អ្វីដែលខ្ញុំបានបង្ហាញជូនទៅកាន់បងប្អូនទាំងអស់គ្នាផង ពីព្រោះរាល់រូបភាពរបស់ខ្ញុំ។
នាងថា ខ្ញុំចំណាយពេលវេលា និងការហត់នឿយខ្លាំងណាស់ ទំរាំតែបានមួយឈុតមួយឈុតហើយអ្វីដែលសំខាន់ស្ទើរតែពេលខ្លះមិនបានគេង ហើយពេលខ្លះទៀតអាចឆ្លងដល់ ២ ទៅ ៣ ថ្ងៃ ទម្រាំតែអាចរៀបចំសម្លៀកបំពាក់បានមួយឈុតមួយឈុត ព្រោះតែចង់ឲ្យបងប្អូនទាំងអស់គ្នាបានឃើញពីឈុតសម្លៀកបំពាក់បែបប្លែកភ្នែកខ្លាំងដែលផុសចេញពីគំនិតក្នុងការគិត និងការរៀបចំរបស់ខ្ញុំ ហើយក៏ចង់ឱ្យបងបងជាអ្នកដែលសារព័ត៌មានទាំងអស់គ្នាបានដឹងច្បាស់ពីការងាររបស់ខ្ញុំជាតារាសម្ដែង ហើយមួយទៀតក៏ជា Fashionista ដែលតែងតែចង់លើកស្ទួយវិស័យម៉ូដនៅក្នុងប្រទេសខ្មែររបស់យើងឲ្យកាន់តែមានភាពរីកចម្រើន ហើយក៏សូមអរគុណយ៉ាងធំធេងបំផុតសម្រាប់អ្នកគាំទ្ររបស់ខ្ញុំ ដែលពួកគាត់តែងតែគាំទ្ររូបភាពរបស់ខ្ញុំ និងតែងតែគាំទ្រការស្លៀកពាក់របស់ខ្ញុំកន្លងមក គ្មានអ្វីក្រៅពីពាក្យអរគុណអរគុណអរគុណទៅកាន់អ្នកទាំងអស់គ្នាតែប៉ុណ្ណោះ។
ជាការកត់សម្គាល់មួយរយៈចុងក្រោយនេះ ព្រីម លីហ្សា ហាក់មិនបានបង្ហាញវត្តមានសម្តែងថ្មីៗបន្ថែមទៀតឡើយ តែផ្ទុយទៅវិញនាងកំពុងមានទីផ្សារជាតារាបង្ហាញម៉ូតម៉ាកល្បីៗ ដែលកំពុងនាំចូលមកកម្ពុជា។ តាមរយៈការងារនេះ តារាស្រីខាងលើក៏តែងតែបង្ហាញគោលបំណងរបស់ខ្លួនចង់លើកស្ទួយវិស័យម៉ូតនៅកម្ពុជាអោយមានការរីកចម្រើនដូចបណ្តាលប្រទេសក្នុងតំបន់ និងពិភពលោកផងដែរ៕ ប្រភព៖ កោះសន្តិភាព
