ជុំវិញការយកទង់ជាតិខ្មែច្នៃជាសម្លៀកបំពាក់ កំពុងក្លាយជាប្រធានបទក្តៅគគុក ជជែកដេញដោលពេញបណ្តាញសង្គម និងតាមតុកាហ្វេ ដោយមតិខ្លះបានលើកឡើងគាំទ្រដល់អាជ្ញាធរអប្សារាថា «មិនចាំបាច់ជាតិនិយមជ្រុល រហូតដល់យកទង់ជាតិច្នៃធ្វើជាសម្លៀកបំពាក់» ខណៈមតិផ្ទុយខ្លះបានលើកឡើងថា «គួរគិតគូររូបប្រាសាទអង្គរនៅកំប៉ុងស្រាបៀរជាមុនសិន សឹមឆ្លងដល់រឿងសម្លៀកបំពាក់» ។
ប្រតិកម្មចម្រុះរបស់មហាជនបានកើតឡើង ក្រោយពីអាជ្ញាធរជាតិអប្សរា តាមរយៈអ្នកនាំពាក្យ បានប្រកាសមិនគាំទ្រចំពោះការយកទង់ជាតិខ្មែរ ទៅច្នៃធ្វើជាម៉ូដ កាត់ជាសម្លៀកបំពាក់ឡើយ ។ លោក ឡុង កុសល អគ្គនាយករង និងជាអ្នកនាំពាក្យអាជ្ញាជាតិអប្សរា ត្រូវបានស្រង់សម្តីយកទៅបង្ហោះក្នុងផេកផ្លូវការរបស់អាជ្ញាធរអប្សារា កាលថ្ងៃទី៨ ខែមីនា ម្សិលមិញនេះ ដោយស្រង់សម្តីលោកថា ការយកទង់ជាតិខ្មែរ ដែលជានិមិត្តរូបរបស់ជាតិខ្មែរ មកច្នៃជាម៉ូដសម្លៀកបំពាក់ គឺជាការមិនសមរម្យ ព្រោះគេតែងតែផ្តល់តម្លៃដល់ទង់ជាតិ គឺទង់ជាតិ តែងតែត្រូវបានបង្ហូតឡើងលើ ដោយអមជាមួយនូវការច្រៀង និងភ្លេងជាតិ។ ទង់ជាតិ គឺជានិមិត្តរូបជាតិ។
ការលើកឡើងរបស់អ្នកនាំពាក្យអាជ្ញាធរជាតិអប្សរា ខាងលើនេះ បានធ្វើឡើងបន្ទាប់ពីអ្នកចម្រៀង និងអ្នកសម្ដែងជាច្រើន បានស្លៀកពាក់ឈុតទង់ជាតិ ក្នុងម៉ូដបុរាណ ហើយបានទៅថតនៅប្រាសាទអង្គរវត្ត និងបង្ហោះព្រោងព្រាតតាមហ្វេសប៊ុក ។
គេកត់សម្គាល់ឃើញថា មានតារាចម្រៀងជួរមុខជាច្រើននៅកម្ពុជា រួមទាំងអ្នកទៅលេងអង្គរវត្តថ្មីនេះបានបង្ហោះរូបភាពស្រស់ស្អាតនៃការយកទង់ជាតិច្នៃធ្វើជាសម្លៀកបំពាក់ ។
យ៉ាងណាមិញ លោក វណ្ណៈ ដែលជាពលរដ្ឋខ្មែរមួយរូប បានបញ្ចេញទស្សនៈថា «ម្នាក់ៗធ្វើដូចស្រឡាញ់ជាតិខ្លាំងណាស់អ៊ីចឹង ។ តែយ៉ាងណាមិញ ត្រូវក្រឡេកមើលស្រុកគេថា គេដល់ណាដល់ណីហើយ មានស្រុកខ្លះ ទង់ជាតិយកទៅផលិតនៅនឹងស្បែកជើងក៏មាន លើលីអូ អាវទ្រនាប់ក៏មាន នៅមានច្រើនទៀតខ្ជិលរៀបរាប់»។
លោកបន្តថា មករិះគន់មិនពេញចិត្តការរូបភាពទង់ជាតិច្នៃធ្វើជាសម្លៀកបំពាក់ ចុះរូបអង្គរវត្ត ដែលជាបេតិកភ័ណ្ឌពិភពលោក ម៉េចក៏ទៅនៅលើកំប៉ុងស្រាបៀរ ដែលគេផឹកហើយ គេនាំគ្នាជាន់សំបកកំប៉ុងមានរូបអង្គរវត្តនោះ ។ នោះម៉េចវិញ?» ។
បន្ថែមពីលើនេះ កញ្ញា ជាតា បុគ្គលិកក្រុមឯកជនមួយរូប បានថ្លែងប្រាប់សារព័ត៌មានកោះសន្តិភាពអំពីទស្សនៈរបស់នាងថា «ខ្ញុំយល់ថា ដូចជាលើសពេកហើយ ព្រោះប្រទេសគេវិញ គេយករូបទង់ជាតិទៅដាក់លើស្បែកជើង សំពត់អាវ និងសម្ភារៈផ្សេងៗ ។ សម្រាប់ការច្នៃនៅខ្មែរវិញ ខ្ញុំឃើញតារា និងបងប្អូនយកមកច្នៃត្រឹមជាអាវពាក់យ៉ាងស្អាត និងការធ្វើបែបនេះជាការផ្សព្វផ្សាយពីប្រទេសជាតិយើងទៅអន្តរជាតិបានស្គាល់ទង់ជាតិខ្មែរកាន់តែច្រើនឡើង» ។
កញ្ញា បានបន្តថា «គ្រាន់តែច្នៃធ្វើជាអាវពាក់លើខ្លួន មិនគួរហាមប្រាមនោះទេ ។ គួរគិតគូរប្រាសាទអង្គរនៅកំប៉ុងស្រាបៀរជាមុនសិន សឹមឆ្លងដល់រឿងសម្លៀកបំពាក់នេះ ព្រោះបើនិយាយពីកំប៉ុងស្រាបៀរវិញ គឺគេជាន់ក្រពិតនៅជាប់កំប៉ុងមានទំហំធំធេងណាស់ ប្រាសាទជាព្រលឹងជាតិយើង តែបែរជារូបភាពអង្គរវត្តលើកំប៉ុងស្រាបៀរ ឬដបស្រាបៀរ គេជាន់នឹងជើងធ្វើជាអេតចាយផង» ។
ចំណែកលោក ចាន់ដា វិញ មានទស្សនៈផ្សេងពីនេះ ។ លោកថា «ស្រលាញ់ជាតិមិនចាំបាច់រហូតដល់យកទង់ជាតិច្នៃធ្វើជាសម្លៀកបំពាក់ទេ សុំត្រឹមរក្សាអត្តសញ្ញាណតាមរយៈការសំពះពេលជួបគ្នា ឬនិយាយពាក្យថាសួស្តី គឺប្រពៃណាស់» ។ លោក ចាន់ដា បន្តថា «ខ្ញុំសង្កេតឃើញ ពេលបងប្អូនខ្មែរយើងមួយចំនួន ជាពិសេសក្មេងៗជំនាន់ក្រោយ ជួបគ្នា លើកដៃនិយាយថា ហេឡូ ទៅវិញ ។ រឿងនេះក៏គួរប្អូនៗពិចារណាឡើងវិញផងដែរ» ។
នៅថ្ងៃទី៩ ខែមីនា នេះផងដែរ ក្រៅពីប្រតិកម្មមិនគាំទ្រការយកទង់ជាតិច្នៃជាសម្លៀកបំពាក់ របស់អាជ្ញាធរអប្សារានោះ ថ្នាក់ដឹកនាំក្រសួងវប្បធម៌ និងវិចិត្រសិល្បៈក៏បានសម្តែងការមិនគាំទ្រការធ្វើបែបនេះឡើយ បើទោះបីជាសកម្មភាពថតបទចម្រៀងនេះ អ្នកដឹកនាំចង់បង្ហាញមោទនភាព និងផ្តើមចេញពីការស្រឡាញ់ជាតិខ្មែរនោះក៏ដោយ ។
