~
តារាសម្តែងវ័យក្មេងនាង អាង សុជាតា បានប្រញាប់ចេញមកប្រកាសបដិសេធភ្លាមៗ បន្ទាប់ពីមានបុរសម្នាក់បានយកលេខទូរស័ព្ទរបស់នាងទៅប្រើប្រាស់ក្នុយនាមជាភរិយា រួចដើរខ្ចីលុយគេ ក្នុងពេលដែលនាងមិនបានស្គាល់បុរសរូបនេះ និងដឹងរឿងឡើយ។
~
យ៉ាងណា គេនៅមិនទាន់ដឹងទេថា បុរសរូបនេះបានប្រព្រឹត្តរឿងរ៉ាវខាងលើនេះ ទៅលើបុគ្គលណា ឬភាគីណាខ្លះនោះឡើយ? ប៉ុន្តែបើតាមអ្វីដែលតារាសម្តែងវ័យក្មេងស្រស់ស្អាត អាង សុជាតា បានសរសេរបង្ហោះសារនោះបានលើកឡើងថា «ជម្រាបសួរបងប្អូនទាំងអស់គ្នា…!! មួយរយៈនេះ មានលេខទូរស័ព្ទជាច្រើនខ្សែបានទាក់ទងមកខ្ញុំសួរថា តើខ្ញុំត្រូវជាអ្វីជាមួយមនុស្សប្រុសម្នាក់នេះ??? ខ្ញុំមិនដែលស្គាល់គាត់ មិនដែលទាក់ទង ឬពាក់ព័ន្ធអីជាមួយនឹងមនុស្សប្រុសម្នាក់នេះឡើយ» ។
~
នាងបញ្ជាក់ថា «មនុស្សម្នាក់នេះ បានដាក់លេខទូរស័ព្ទរបស់ខ្ញុំជាលេខទូរស័ព្ទក្នុងនាមជាប្រពន្ធរបស់គាត់ ហើយទៅខ្ចីលុយគេ ដូច្នេះបើមានបញ្ហាអី ខ្ញុំមិនទទួលខុសត្រូវនោះទេ សុំបងប្អូនទាំងអស់ទទួលដឹងឮផង អរគុណ»។
~
~
ដោយឡែក ពាក់ព័ន្ធនឹងបញ្ហាខាងលើនេះ អ្នកនាង សឿន ផាន់ ផាភួង ដែលជាម្តាយរបស់ អាង សុជាតា បានបញ្ជាក់បន្ថែមប្រាប់កោះសន្តិភាពតាមសារអេឡិចត្រូនិចនៅថ្ងៃនេះថា «ករណីនេះកន្លងមក អ្នកនាងក៏ធ្លាប់ឃើញបុរសម្នាក់នេះ ធ្លាប់ចូលទៅខំមិនលេងជាមួយនាង ដោយហៅនាងថា ម្តាយក្មេកផងដែរ»។
~
អ្នកនាងបញ្ជាក់ថា «ដំបូងនាងគិតរឿងនេះ គ្រាន់ជាការលេងសើច ឬជាហ្វ្រេនកូនស្រី ទើបនាងមិនចាប់អារម្មណ៍ និងមិនមានការចាប់អារម្មណ៍អ្វីដែរ ប៉ុន្តែមួយរយៈចុងក្រោយនេះ កូនរបស់នាង (អាង សុជាតា) ធ្លាប់ប្រាប់ជារឿយៗដែរ ហើយនោះក៏នាងគិតថា មិនមានរឿងអ្វីធំដុំឡើយ»។
~
នាងបន្ថែមថា «លុះក្រោយមក ក៏មានខាងធនាគារមួយបានខលមកលេខកូនស្រីខ្ញុំ ដោយអះអាងថា ប្តីជំពាក់លុយ ដោយនាង និងកូនស្រីមិនបានដឹងរឿងអ្វីសោះ ខណៈពេលដែលនាងក៏មានការចាប់អារម្មណ៍ចំពោះរឿងនេះ ពិតជាគេយកលេខកូនស្រីខ្លួនទៅប្រើប្រាស់ខ្ចីលុយគេ»។
~
ផាភួង លើកឡើងថា «ឆ្ងល់ជាធម្មតា ប្រសិនបើឲ្យខ្ចីលុយមិនឃើញមុខប្រពន្ធច្បាស់ គ្រាន់តែស្គាល់លេខទូរស័ព្ទក៏ខលមកទារលុយចឹង ហើយរឿងនេះ អ្នកនាងក៏មិនទាន់បានដឹងរឿងច្បាស់លាស់នោះដែរ»។
~
អ្នកនាង ផាន់ ផាភួង លើកឡើងបញ្ជាក់បន្ថែមថា «ចំពោះរឿងនេះ អ្នកនាងគិតថា មិនអាចក្លាយជារឿងធំឡើយ ព្រោះនេះគ្រាន់តែជាលេខទូរស័ព្ទ ដោយមិនមានស្នាមផ្តិតមេដាយ ឬក៏មានអត្តសញ្ញាណបណ្ណបញ្ជាក់អ្វីឡើយ»។
~
ទោះជាយ៉ាងណា បើតាមអ្នកនាង ផាន់ ផាភួង ថា រហូតមកទល់នាពេលនេះ អ្នកនាង និងកូនស្រី នៅមិនទាន់មានវិធានការណាមួយចំនួនបុរសរូបនេះឡើយ ដោយគ្រាន់តែបង្ហោះហ្វេសប៊ុកឲ្យមហាជនបានដឹងប៉ុណ្ណោះ ប៉ុន្តែទៅថ្ងៃមុខ ប្រសិនបុរសនោះនៅតែហ៊ានធ្វើរឿងដដែលនេះបន្តទៀត នោះនាងនឹងមានវិធានការដោយចៀសមិនបានឡើយ៕
~
~
~
~
