ភ្នំពេញ ៖ ថ្មីៗនេះ អតីតបវរកញ្ញា Miss Grand Cambodai 2020 លីវ ជីលី ធ្វើឱ្យហ្វេនៗមានការត្រេកអរ និងសប្បាយរីករាយជាខ្លាំង ព្រោះតែនាងអាចរក្សាកិត្តិយសសំខាន់ ដែលអាចគ្រងមកុដពីកម្មវិធីប្រកួតមកុដ Miss Supranational Camboda2023 បានសម្រេច។ ហើយធ្វើឱ្យម្នាក់ៗបុកពោះផងដែរ ដ្បិតតែស្រីស្អាត ជីលី ធ្លាប់ជាបវរកញ្ញា ស្គាល់ឆាកប្រកួតនិងឡើងបង្ហាញរាងទាំងក្នុង និងក្រៅស្រុកឃើញថា នោះជាអ្វីដែលថ្មី និងត្រូវប្រើតិចនិចថ្មីប្រកួតប្រជែងចំណេះដឹងគេឯងដែលមានសមត្ថភាពមិនចាញ់គ្នានោះឡើយ។
ប៉ុន្តែមួយចំនួនទៀត ហាក់មានការខកចិត្ត និងសម្ដែងការហួសចិត្តយ៉ាងខ្លាំងពីសំណាក់អ្នកនិយមលេងនៅក្នុងបណ្ដាញទំនាក់ទំនងសង្គមហ្វេសប៊ុកជាច្រើនទៅលើកម្មវិធី Miss Supranational Cambodia គ្រប់ៗគ្នាតែម្ដង។
មិនទុកយូរ ក្រោយឃើញអតីត Miss Grand Cambodai 2020 ស្រីស្អាត លីវ ជីលី អាចគ្រងមកុដពីកម្មវិធីប្រកួតមកុដ Miss Supranational Camboda2023 បានសម្រេច ប៉ុន្តែអ្វីដែលធ្វើអោយអ្នករាល់គ្នានឹកស្មានមិនដល់ជាងនេះទៅទៀតនោះ បន្ទាប់ពីឃើញជ័យជម្នះរបស់កញ្ញា លីវ ជីលី នៅក្នុងការប្រកួត Miss Supranational Cambodia ឆ្នាំ២០២៣ ចប់សព្វគ្រប់រួចមក ក៏ឃើញមានការបញ្ចេញមតិពីមហាជនជាច្រើនហូរហែ និយាយមិនឈប់នៅលើបណ្តាញសង្គម ដោយមានមតិរិះគន់ប្រតិកម្មឥតឈប់ឈរ លើកឡើងពីមួយទៅមួយតៗគ្នាយ៉ាងចាស់ដៃ និងមតិមិនពេញចិត្តជាច្រើនបានសម្រុកខមិនវែកញែកខឹងសម្បារទៅលើតំណែងមួយនេះរបស់បវរកញ្ញារូបនេះ។
ដោយពួកគេនាំគ្នាចូលទៅខមិនលើកឡើងថា «ខ្ញុំអត់យល់នោះទេ មិចបានមិនអោយអ្នកថ្មីៗជាប់អញ្ចឹង មិនដឹងថា កម្មវិធីនេះជាកម្មវិធីអ្វីនោះទេ» «ជីលី មិនមែនមិនល្អទេ តែចង់បានអ្នកថ្មីហើយប្លែកទៅអន្តរជាតិ» «មិនមែនរិះគន់ទេ តែឈុតបងលី អត់សម best សោះ»។ អ្នកខ្លះទៀតក៏បាននិយាយបញ្ចេញមតិថា «ខំចាំមើលទាំងអត់ងងុយ ចុងក្រោយអ្នកបានមកុដទៅជា លីវ ជីលី ទៅវិញ គួរអោយអស់សំណើចខ្លាំងណាស់លោកអើយ អ្នកថ្មីៗមានចំណេះដឹង ពូកែៗប្រហែលជាមិនអាចមានសមត្ថភាពជាប់ទេមើលទៅ បានជាអោយតែអ្នកចាស់ជាប់បែបនេះនោះ» «យូរៗទៅ ដូចស៊ីខ្សែលើយ៉ាងម៉េចមិនដឹងនោះទេ អស់អារម្មណ៍មើលហើយ បើវល់ៗដូច្នេះនោះ កាន់តែយូរៗទៅអ្នកថ្មីៗចូលប្រកួតអត់តែប្រយោជន៍»។
ហ្វេនៗឯទៀតក៏បានដាក់ចំៗថា «ខ្ញុំសូមបញ្ចេញយោបល់បន្តិទៅចុះ មិនមែនថា មិនចង់អោយបង លីវ ជីលី ជាប់មកុដនោះទេ តែនេះវាហាក់បីដូចជាហួសហេតុពេក របស់ល្អៗ ថ្មីៗ ហេតុអ្វីមិនអោយគ្នាមានឱកាសបានទៅប្រកួតនៅលើឆាកអន្តរជាតិខ្លះផងទៅ? បើគិតតែអោយអ្នកចាស់ជាប់ អ្នកក្រោយៗមកប្រកួតទៀត មិនបាច់អោយប្រកួតទេ»។ «អ្នកណាជាប់ក៏ពួកគាត់តំណាងអោយប្រទេសកម្ពុជាយើងដែរ ចឹងពួកយើងគាំទ្រទាំងអស់» «គាត់ស្អាតសាកសមមានទាំងសម្រស់ កម្ពស់ ក្លាហាន ទោះជាប់ដោយសារខ្សែក៏មិនបញ្ហា! បើជាប់ដោយសារខ្សែ ហើយអត់ស្អាតទៀត បានគេរិះគន់»។
ចំណែកខ្លះទៀតក៏បានពន្យល់ថា «ឈប់នាំគ្នាថាអោយគាត់ទៀតទៅ គាត់ក៏មិនអន់នោះដែរ កាលពីមុនបើគ្មានវត្តមានគាត់ ក៏អ្នកទាំងអស់គ្នាមិនស្គាល់កម្មវិធីប្រឡងនោះដែរ ដូចនេះហើយសូមបើកចិត្តអោយទូលាយ កុំចិត្តចង្អៀតពេកអី កម្មវិធីមានរហូតតើ មិនមែនមានតែម្ដងអីណា»។
សូមជំរាបផងដែរថា កាលពីយប់ថ្ងៃទី០១ ខែមេសា ឆ្នាំ២០២៣ កន្លងទៅប៉ុន្មានថ្ងៃមុននេះ នៅក្នុងការប្រកួត Miss Supranational Cambodia ឆ្នាំ២០២៣ រកឃើញបរវកញ្ញាដែលគ្រងមកុដហើយ គឺបានទៅលើបវរកញ្ញា លីវ ជីលី តំណាងឱ្យខេត្តកំពង់ធំ ដែលឈ្នះមកុដបវរកញ្ញា Miss Supranational Cambodia ឆ្នាំ២០២៣ ដើម្បីឡើងប្រកួតបន្តនៅលើឆាកអន្តរជាតិតំណាងឱ្យបវរកញ្ញាកម្ពុជា៕
