Wednesday, December 7, 2022
Google search engine
Homeព័ត៌មានជាតិអបអរសាទរ! កម្ពុជា ទទួលមេដាយមាសទី១ នៅអាស៊ានប៉ារ៉ាហ្គេម ​ផ្នែកបាល់បោះរទេះ​នារី​

អបអរសាទរ! កម្ពុជា ទទួលមេដាយមាសទី១ នៅអាស៊ានប៉ារ៉ាហ្គេម ​ផ្នែកបាល់បោះរទេះ​នារី​

ភ្នំពេញ៖ ជាដំណឹងដ៏គួរឱ្យរីករាយ និងប្រកបដោយមោទកភាពណាស់ ដែល​អបអរសាទរ ដែល​កម្ពុជា ទទួលបាន​មេដាយមាសទី១ នៅអាស៊ានប៉ារ៉ាហ្គេម។ នោះគឺក្រុមបាល់​បោះរទេះ​នារីកម្ពុជា ៣ ទល់ ៣ ដណ្តើមបានមេដាយមាស ជាមួយកំណត់ត្រាឈ្នះ ១០០% ជូនកម្ពុជា នារសៀល​ថ្ងៃទី៣១ ខែកក្កដានេះ។ នាវគ្គផ្តាច់ព្រ័ត្រ កម្ពុជា បានយកឈ្នះក្រុមនារីថៃ ដោយលទ្ធផល ៧-៥។

ក្នុងព្រឹត្តិការណ៍ប្រកួត​បាល់​បោះរទេះនារីនេះ លោក ហ៊ុន ម៉ានី អ្នកតំណាងរាស្ត្រ និងជាប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានដឹកនាំក្រុមការងាររបស់លោក ទៅទស្សនា និងលើកទឹកចិត្តក្រុមកីឡាករកម្ពុជា​ដោយផ្ទាល់។ លោក ហ៊ុន ម៉ានី បានលោតអបអរសាទរក្រុមបាល់បោះជិះរទេះនារីកម្ពុជា ពេលឈ្នះថៃ ដើម្បីបានមេដាយមាស លើវិញ្ញាសានារី ៣ ទល់ ៣ នៅក្នុង​ព្រឹត្តិការណ៍អាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូនេស៊ី។

ដោយឡែក នៅរសៀលថ្ងៃទី៣១ ខែកក្កដា​នេះ ក្រុមបាល់បោះជិះរទេះជនពិការបុរសកម្ពុជា បរាជ័យក្នុងវគ្គផ្តាច់ព្រ័ត្រដណ្តើម​មេដាយសំរឹទ្ធិ ក្រោមថ្វីដៃម្ចាស់ផ្ទះឥណ្ឌូនេស៊ី​ ដោយលទ្ធផល​ ៩-៥​​។​

កម្ពុជា បានបញ្ជូន​កីឡាករជនពិការ ១១ប្រភេទ ទៅ​ចូលរួម​ការប្រកួតព្រឹត្តិការណ៍កីឡា​អាស៊ានប៉ារ៉ាហ្គេម លើកទី១១ ចាប់ពី​ថ្ងៃទី៣០ ខែកក្កដា ដល់ថ្ងៃទី៦ ខែសីហា ឆ្នាំ២០២២ នៅទីក្រុង Surakarta ឬទីក្រុង Solo ប្រទេសឥណ្ឌូណេស៊ី។

លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានឱ្យដឹងថា កីឡាជនពិការ១១ប្រភេទ​របស់កម្ពុជា ដែល​ចូលរួមប្រកួតព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ នេះ រួមមាន៖ កីឡាអត្ដពលកម្ម, បាល់ទះអង្គុយបុរស និងនារី, ហែលទឹក, បាល់បោះរទេះបុរស និងនារី, បាល់បោះជនពិការភ្នែក, បាល់ទាត់ ៧ម្ខាង (ចលករខួរក្បាល), វាយកូនឃ្លីលើតុ, វាយសី, លើកទម្ងន់, អុក និងបូស្យា។

ក្នុងការប្រកួតអាស៊ានប៉ារ៉ាហ្គេម លើកទី១០ នៅប្រទេសហ្វីលីពីន កាលពីឆ្នាំ២០២០ ត្រូវបាន​លុបចោល ដោយសារបញ្ហារីករាលដាលជំងឺកូវីដ-១៩។ ដោយឡែក សម្រាប់ការប្រកួត លើកទី៩ នៅប្រទេសម៉ាឡេស៊ី ក្នុងឆ្នាំ២០១៧ កម្ពុជា ឈ្នះបានមេដាយប្រាក់ ៥គ្រឿង និង​សំរិទ្ធ ៥គ្រឿង។

ព្រឹត្តិការណ៍កីឡា អាស៊ានប៉ារ៉ាហ្គេម ត្រូវបាន​បង្កើតឡើង កាលពីឆ្នាំ២០០១ ដោយមានប្រទេស​អាស៊ានទាំង ១០ប្រទេស ចូលរួម​ប្រកួត។ ម៉ាឡេស៊ី បានធ្វើជាម្ចាស់ផ្ទះ ព្រឹត្តិការណ៍កីឡា​អាស៊ានប៉ារ៉ាហ្គេម លើកទី១។ រហូតដល់ឆ្នាំ២០០៣ ព្រឹត្តិការណ៍កីឡាអាស៊ានប៉ារ៉ាហ្គេម បានបញ្ចូលប្រទេស​ទីម័រខាងកើតមួយទៀត​។

នៅឆ្នាំ២០២៣ កម្ពុជាយើង នឹងធ្វើជាម្ចាស់ផ្ទះរៀបចំការប្រកួតព្រឹត្តិការណ៍កីឡា ស៊ីហ្គម លើកទី៣២ និងព្រឹត្តិការណ៍កីឡា អាស៊ានប៉ារ៉ាហ្គេម លើកទី១២ នៅរាជធានីភ្នំពេញ៕

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine
Google search engine
Google search engine
Google search engine

Most Popular

Recent Comments