~
ខេត្តសៀមរាប ៖ បើតាមសមត្ថកិច្ចនគរបាលជំនាញ បានឱ្យដឹងនៅរសៀលថ្ងៃទី២០ ខែកក្កដា ឆ្នាំ២០២២នេះថា ថៅកែត្រីម្នាក់ ពាក់ព័ន្ធនឹងករណីឆបោ.កទឹកប្រាក់ចំនួន២ម៉ឺនដុល្លារសហរដ្ឋ អាមេរិក ហើយត្រូវបានលោក សុវណ្ណ ច័ន្ទន៍គ្រឹស្នា ចៅក្រមស៊ើបសួរនៃសាលាដំបូងខេត្តសៀមរាប សម្រេចឃុំខ្លួនហើយ។
~
សមត្ថកិច្ចបានឱ្យដឹងបន្តថា ការឃាត់ខ្លួននេះ ធ្វើឡើងនៅថ្ងៃទី១៨ ខែកក្កដា ឆ្នាំ២០២២ ដោយយោងតាមពាក្យបណ្តឹង លេខ៥៤/២២ ព្រ.ទ.ក.ស ចុះថ្ងៃទី១៧ ខែឧសភា ឆ្នាំ២០២២ របស់ឈ្មោះ សុខ រ៉ាដែន ភេទប្រុស អាយុ៥៣ឆ្នាំ ប្ដឹងពីបទករណី ឆបោ.ក ដែលប្រព្រឹត្តនៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាម កាលពីថ្ងៃទី០៦ ខែមករា ឆ្នាំ២០២២។
សមត្ថកិច្ចបន្តថា ប្រតិបត្តិការខាងលើនេះ គឺអនុវត្តតាមដីកាសម្រេចឱ្យបើកការស៊ើបអង្កេតបឋមលេខ៣៦២ អយក/២២ ចុះថ្ងៃទី២៤ ខែឧសភា ឆ្នាំ២០២២ របស់លោក មាស ច័ន្ទពិសិដ្ឋ ព្រះរាជអាជ្ញា នៃអយ្យការសាលាដំបូងខេត្តសៀមរាប។
~
~
គួររម្លឹកថា កាលពីថ្ងៃទី០៦ ខែមករា ឆ្នាំ២០២១ ឈ្មោះ សុខ រ៉ាដែន ភេទប្រុស អាយុ៥៣ឆ្នាំ បានប្រគល់ប្រាក់ចូលហ៊ុនចំនួន ២០.០០០ដុល្លារ ឱ្យទៅឈ្មោះ សុខ យ៉ន (ជនត្រូវចោទ) ភេទប្រុស អាយុ៤៤ឆ្នាំ ដើម្បីធ្វើប្រតិបត្តិការទិញត្រី ពីវារីសិប្បកម្មកម្ពុជា និងអាជីវកម្មនាំចូលត្រី ប៉ុន្តែជនសង្ស័យរូបនេះ បានយកប្រាក់ទៅប្រើប្រាស់ផ្ទាល់ខ្លួន ព្រមទាំងគ្មានប្រាក់ដាក់ទុនចំនួន ២០០០០ដុល្លារ ជាមួយនឹងឈ្មោះ សុខ រ៉ាដែន (ជនរងគ្រោះ) ផងដែរ។
~
~
សមត្ថកិច្ចបញ្ជាក់ទៀតថា តាមចម្លើយ និងសារភាពរបស់ជនសង្ស័យខាងលើ បានសារភាពកាលពីថ្ងៃទី០៦ ខែមករា ឆ្នាំ ២០២១ ថា ខ្លួនពិតជាបានទទួលប្រាក់ចំនួន ២០,០០០ ដុល្លារ ពី ឈ្មោះ សុខ រ៉ាដែន ដែលចូលហ៊ុនធ្វើអាជីវកម្មទៅប្រើប្រាស់ផ្ទាល់ខ្លួនអស់ ព្រមទាំងខ្លួនគ្មានប្រាក់ដាក់ទុនចូលហ៊ុនជាមួយឈ្មោះ សុខ រ៉ាដែន ពិតប្រាកដមែន»។
~
បច្ចុប្បន្ន ជនសង្ស័យខាងលើ ត្រូវបានលោក សុវណ្ណ ច័ន្ទន៍គ្រឹស្នា ចៅក្រមស៊ើបសួរនៃសាលាដំបូងខេត្តសៀមរាប សម្រេចបញ្ជាឱ្យសមត្ថកិច្ចនាំខ្លួនយកទៅដាក់ពន្ធនាគារខេត្តសៀមរាបជាបណ្ដោះអាសន្ន៕
~
~
~
