~
ភ្នំពេញ ៖ សារជាសំឡេងរបស់លោកវរសេនីយ៍ទោស ម៉ាន សុផាន់ណា នាយការិយាល័យនគរបាលចរាចរណ៍ផ្លូវគោកនៃនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ បានអោយដឹងពាក់ព័ន្ធនឹងការអនុវត្ត (អនុក្រឹត្យលេខ៣៩) ការរឹតបន្តឹងច្បាប់ចរាចរណ៍ផ្លូវគោក និងយោងតាមកិច្ចប្រជុំកាលពីថ្ងៃទី១៧ មិថុនា ២០២២ ក្រោមអធិបតីភាពនាយឧត្តមសេនីយ៍ ហ៊ឹម យ៉ាន អគ្គស្នងការរងរនគរបាលជាតិ សូមធ្វើការណែនាំដល់លោកនាយការិយាល័យ ទាំង២៥ រាជធានី-ខេត្ត ស្តីពីការកែសម្រួលចំពោះរថយន្ត ០៩ ចំណុច និងម៉ូតូ ០៧ ចំណុច មានដូចតទៅ ៖
~
ទី១. រថយន្តពិន័យ ០៩ ចំណុច ត្រូវកែសម្រួលមក (ការអប់រំ ០៥ ចំណុច និងពិន័យ ០៤ ចំណុច)
~
+ការអប់រំ ០៥ ចំណុច រួមមាន ៖
១. មិនគោរពភ្លើងសញ្ញា ផ្លាកសញ្ញា
២. ការល្មើសបទ និងជែង
៣. ការមិនពាក់ខ្សែក្រវ៉ាត់
៤. ការដឹកលើសចំណុះ (អប់រំណែនាំ និងរើទំលាក់ចុះ តាមច្បាប់កំណត់)
៥. ការប្រើប្រាស់ទូរសព្ទ
~
~
+ការពិន័យ ០៤ ចំណុច រួមមាន ៖
១. ល្មើសល្បឿនកំណត់
២. បើកបរក្នុងស្ថានភាពស្រវឹង
៣. គ្មានបណ្ណបើកបរ
៤. អត់ផ្លាកលេខ និងបណ្ណសម្គាល់រថយន្ត
~
និងទី២. ម៉ូតូពិន័យ ០៧ ចំណុច ត្រូវកែសម្រួលមក (ការអប់រំ ០៤ចំណុច និង ពិន័យ ០៣ចំណុច)
+ការអប់រំ ០៤ ចំណុច រួមមាន ៖
១. មិនគោរពភ្លើងសញ្ញា ផ្លាកសញ្ញា
២. ការល្មើសបទ និងជែង
៣. ការប្រើប្រាស់ទូរសព្ទ
៤. គ្មានកញ្ចក់ឆ្លុះត្រឡប់ក្រោយ
~
+ការពិន័យ ០៣ចំណុច រួមមាន ៖
១. មិនពាក់មួកសុវត្ថិភាព (តែត្រូវចេះបត់បែនតាមកាលៈទេសៈ បើមិនអាចទេ ត្រឹមធ្វើការអប់រំ)
២. បើកបរក្នុងស្ថានភាពស្រវឹង
៣. គ្មានផ្លាកលេខ ។
~
កាលពីវេលាម៉ោង ៩ព្រឹកថ្ងៃទី១៨ ខែមិថុនា ឆ្នាំ២០២២ លោកវរសេនីយ៍ឯក សែម រតនា នាយការិយាល័យនគរបាលចរាចរផ្លូវគោត រាជធានីភ្នំពេញ បានដឹកនាំកិច្ចប្រជុំផ្សព្វផ្សាយផែនការរបស់នាយកដ្ឋាននគរបាលចរាចរ និង សណ្តាប់ធ្នាប់សាធារណៈ ស្តីពីគោលការណ៍ចុះរឹតបន្តឹងការអនុវត្តច្បាប់ ស្តីពីចរាចរណ៍ផ្លូវគោក ដោយបានណែនាំកម្លាំងនគរបាលតាមគោលដៅទាំងអស់ រួមមាន ៖ ផ្នែសណ្តាប់ធ្នាប់ចរាចរណ៍ខណ្ឌទាំង១៤ និងនាយរងការិយាល័យនាយផ្នែកជំនាញចំណុះការិយាល័យនគរបាលចរាចរណ៍ផ្លូវគោក ត្រូវអនុវត្តច្បាប់ឲ្យចំទិសដៅ ស្របតាមការណែនាំរបស់នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិទទួលផែននាយកដ្ឋាននគរបាលចរាចរ និងសណ្តាប់ធ្នាប់សាធារណៈ ។
~
សូមបញ្ជាក់ឡើងវិញថា កន្លងទៅ ការពិន័យអន្តរការណ៍ចំពោះអំពើល្មើស នឹងច្បាប់ចរាចរណ៍ផ្លូវគោក សម្រាប់រថយន្ត គឺត្រូវពិន័យទាំង ០៩ ចំណុច និងម៉ូតូ ត្រូវពិន័យចំនួន ០៧ចំណុច ដែលមានទឹកប្រាក់ចាប់ពី ៦០,០០០រៀល ទៅដល់ ២,៤០០,០០០រៀល (តាមប្រភេទយាន) ។
~
ជាការកត់សម្គាល់ សម្រាប់ការអនុវត្តច្បាប់ចរាចរណ៍តាមដងផ្លូវកន្លងទៅ មានការថ្នាំងថ្នាក់ពីប្រជាពលរដ្ឋផងដែរ ជាពិសេសការចាប់ផាកពិន័យពួកគាត់រហូតមានការប្រទូស្តរាយគ្នា និងស្រែកតវ៉ាទៀតផង ។ ទោះជាយ៉ាងណាក៏ដោយ ក៏អ្នកដំណើរខ្លះ មិនបានចូលរួមអនុវត្តឲ្យបានត្រឹមត្រូវនៅឡើយទេ ដូចជាការបើកបរមិនគោរពភ្លើងក្រហម ការជែងមិនមើលគន្លងផ្លូវ និង បើកបរលើសជាតិអាកុល ជាដើម ៕ ប្រភព៖ កោះសន្តិភាព
~
~
