~
~
ស្ត្រីម្នាក់បានចូលទៅធ្វើសកម្មភាពលួចទូរស័ព្ទនៅកន្លែងលក់ទូរស័ព្ទតាមកញ្ច្រែងនៅតាមចិញ្ចើមផ្លូវ ២កន្លែង ដោយយកបានជាច្រើនគ្រឿង និងបម្រុងរត់គេចខ្លួនទៅហើយ ប៉ុន្តែភ្លាមៗនោះត្រូវបានម្ចាស់ឃើញទាន់ស្រែកឆោឡោ បង្កការភ្ញាក់ផ្អើលនិងចាប់ខ្លួនបាន រួចប្រគល់ឲ្យនគរបាលនាំទៅសាកសួរនិងកសាងសំណុំរឿងចាត់ការតាមច្បាប់តែម្ដង។
~
~
~
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង១២និង២០នាទីថ្ងៃត្រង់ថ្ងៃទី១៧ ខែមិថុនា ឆ្នាំ២០២២ នៅក្បែរសួនឧស្សាហកម្មកាណាឌីយ៉ា ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
~
~
នគរបាលបានប្រាប់ថា ស្ត្រីដែលជាជនសង្ស័យឈ្មោះហួត ចាន់រី អាយុ២០ឆ្នាំ មានទីលំនៅភូមិស្ដៅ ឃុំក្រាំងស្វាយ ស្រុកព្រះស្ដេច ខេត្តព្រៃវែង និងបានមកស្នាក់នៅផ្ទះជួលស្ថិតនៅក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។ ដោយឡែកម្ចាស់ទូរស័ព្ទប្ដីឈ្មោះឡាយ ស៊ីទៀង អាយុ៤៥ឆ្នាំ មានស្រុកកំណើតនៅភូមិ៥ ឃុំរការ ស្រុកក្រូចឆ្មារ ខេត្តកំពង់ចាម និងប្រពន្ធឈ្មោះលី ចាន់លត អាយុ៤១ឆ្នាំ ។ ពួកគាត់ត្រូវបានស្ត្រីខាងលើលួចយកទូរស័ព្ទចំនួន៨គ្រឿង តែត្រូវបានដកហូតយកមកវិញបានទាំងអស់ ។ រីឯម្ចាស់ទូរស័ព្ទម្នាក់ទៀតពុំស្គាល់អត្តសញ្ញាណឡើយ ហើយក៏ត្រូវបានជនសង្ស័យលួចទូរស័ព្ទបានច្រើនគ្រឿងដែរ ប៉ុន្តែត្រូវបានដកហូតយកមកវិញហើយដែរ។
~
~
នគរបាលបានប្រាប់ថា នៅមុនពេលកើតហេតុ ជនរងគ្រោះបានដាក់ទូរស័ព្ទនៅក្នុងកញ្ច្រែងលក់នៅតាមផ្លូវ ខណៈនោះគាត់បានរវល់ចូលធ្វើម្ហូបនៅក្នុងផ្ទះ ហើយបានឲ្យកូននៅលក់ ។ ខណៈនោះស្រាប់តែជនសង្ស័យចូលទៅធ្វើសកម្មភាពលួចយកទូរស័ព្ទរបស់គាត់ចំនួន៨គ្រឿង និងរបស់អ្នកលក់ជិតគ្នានោះមួយចំនួនទៀត ។ ប៉ុន្តែភ្លាមៗនោះត្រូវបានកូនជនរងគ្រោះនិងម្ចាស់ទូរស័ព្ទនៅជិតនោះឃើញទាន់ ស្រែកឆោឡោនិងចាប់ខ្លួនបានរួចរាយការណ៍ប្រាប់នគរបាលឲ្យទៅយកជនសង្ស័យខាងលើនាំទៅសាកសួរនិងកសាងសំណុំរឿងចាត់ការតាមច្បាប់តែម្ដង ៕
~
~
~
~
~
