រដ្ឋបាលស្រុកបន្ទាយស្រី ក្រុមការងារគម្រោងតុក្កតាយក្ស ក៏ដូចជាអ្នកស្ម័គ្រចិត្តជិត ២០០ នាក់ បានសហការគ្នាធ្វើតុក្កតា (ទីងមោងយក្ស) ចំនួន ៨ តុក្កតាធំៗ និងតូចៗមួយចំនួនទៀត ដើម្បីទាក់ទាញភ្ញៀវទេសចរ និងចូលរួមអបអរសាទរទិវាបុណ្យជាតិផងដែរ។ នេះបើតាមលោក ឃឹម ហ្វីណង់ អភិបាលស្រុកបន្ទាយស្រីនៅថ្ងៃចន្ទ ទី ៧ ខែមីនា។
លោក ឃឹម ហ្វីណង់ បានឱ្យដឹងថា គម្រោងតុក្កតាយក្សនេះ គឺកើតចេញមកពីកិច្ចសហប្រតិបត្តិការរវាងរដ្ឋបាលស្រុកបន្ទាយស្រីជាមួយក្រុមការងារដើមមកពី «គម្រោងតុក្កតាយក្ស»ដែលធ្លាប់មានវត្តមានជាប្រចាំជារៀងរាល់ឆ្នាំនៅក្នុងក្រុងសៀមរាប កាលពីមិនទាន់មានការរីករាលដាលនៃជំងឺកូវីដ។
ក្រៅពីនោះ គម្រោងនេះក៏មានការសហការចូលរួម និងឧបត្ថម្ភគាំទ្រពីសហភាពសហព័ន្ធយុវជនកម្ពុជាស្រុកបន្ទាយស្រី សមាគមកាយឫទិ្ធនារីកម្ពុជា បណ្តាញសហគមន៍ទេសចរណ៍ និងវិស័យឯកជននៅក្នុងស្រុកបន្ទាយស្រីជាច្រើនទៀតផងដែរ។ គិតមកទល់ថ្ងៃចន្ទ ទី ៧ ខែ មីនា ឆ្នាំ ២០២២ មានយុវជននិងអ្នកស្ម័គ្រចិត្តចូលរួមជួយធ្វើជិត ២០០ នាក់ ចាប់តាំងពីគម្រោងបានចាប់ផ្តើមកាលពីដើមខែកុម្ភៈកន្លងមក។
លោកបានបញ្ជាក់ថា៖ «គម្រោងនេះ ធ្វើឡើងដើម្បីអបអរសាទរទិវាវប្បធម៌ជាតិ និងទិវាសិទ្ធិនារី និងដើម្បីបង្កើតភាពទាក់ទាញទេសចរមកក្នុងស្រុកដូចអ្វីដែលស្រុកតែងតែធ្វើជាប្រចាំ»។
លោកបានបន្ថែមថា គម្រោងបែបនេះរដ្ឋបាលស្រុកគ្រោងនឹងធ្វើឡើងជារៀងរាល់ឆ្នាំប្រសិនបើអាច ហើយថែមទាំងមានការហែក្បួនផងដែរ។ ប៉ុន្តែក្នុងឆ្នាំនេះដោយហេតុតែមានការរីករាលដាលនៃមេរោគកូវីដបំប្លែងខ្លួនថ្មីអូមីក្រុងនៅក្នុងសហគមន៍ទើបក្រុមការងារបានសម្រេចលើកកម្មវិធីហែក្បួននេះទៅពេលក្រោយវិញ ហើយបាននិងកំពុងដាក់តាំងបង្ហាញជាបណ្តោះអាសន្ននូវរូបតុក្កតាជាបណ្តើរៗនៅក្នុងផ្សារហេរីថេកវ៉ក។
លោកក៏បានឱ្យដឹងផងដែរថា តុក្កតាយក្សទាំងនេះ គឺជារូបត្លុកទីងមោងកំប្លែងបែបសិល្បៈដែលអាចមានចលនាបានដើម្បីបង្កបរិយាកាសរីករាយដល់ការទស្សនាកម្សាន្តរបស់ភ្ញៀវទេស
ចរ តែក៏ត្រូវបានជ្រើសរើសយ៉ាងផ្ចិតផ្ចង់ និងមានបង្កប់អត្ថន័យខ្លឹមសារតំណាងឱ្យសិល្បៈ វប្បធម៌ បរិស្ថាន អត្តសញ្ញាណនៅក្នុងស្រុកបន្ទាយស្រី និងភាពច្នៃប្រឌិតបង្កើតថ្មីផងដែរ។
លោកបានសរសេរលើហ្វេសប៊ុករបស់លោកថ្មីៗនេះថា៖ «អ្វីដែលពិសេសបំផុតនោះ គឺតុក្កតាយក្សទាំងអស់ត្រូវបានផលិតឡើងដោយផ្ទាល់ដៃពីសំណាក់ក្មួយៗកុមារតូចៗ ប្អូនយុវនារី យុវជន បុគ្គលនៃក្រុមហ៊ុនឧបត្ថម្ភគាំទ្រ និងមហាជនទូទៅ ក្រោមការដឹកនាំនិងត្រួតពិនិត្យរបស់ក្រុមសិល្បករជំនាញមកពីសាលាហ្វារពន្លឺសិល្បៈខេត្តបាត់ដំបង»។
តុក្កតាយក្សនីមួយៗ ត្រូវបានផលិតឡើងពីផ្តៅ រពាក់ ឫស្សី ក្រដាសពណ៌ មានយន្តការអាចធ្វើចលនាបាន និងមានបង្កប់អំពូលភ្លើងបំភ្លឺនៅខាងក្នុង ព្រមទាំងមានកង់រទេះទម្រពីក្រោមសម្រាប់ការដង្ហែក្បួនផងដែរ។
រូបតុក្កតាមានទម្រង់ខុសៗគ្នា ដូចជា៖ រូបសត្វខ្លាតំណាងឱ្យឆ្នាំខាល រូបល្ខោនខោល រូបស្ត្រីគ្រប់លក្ខណ៍នៃប្រាសាទបន្ទាយស្រី រូបសត្វខ្សឹប ដែលជាសត្វជិតផុតពូជ រូបខ្លែងឯក រូបសត្វនាគ រូបអ្នកលក់នំបញ្ចុក រូបអ្នករែកទឹកត្នោត និងរូបផ្លែត្រសក់ផ្អែមជាដើម៕ ប្រភព៖ ភ្នំពេញប៉ុស្តិ៍
