~
អគ្គនាយកបច្ចេកទេសធនាគារជាតិនៃកម្ពុជា បានអំពាវនាវបន្ថែមដល់សហគ្រិន និងបងប្អូនប្រជាពលរដ្ឋ ជាពិសេសពលករទាំងអស់ឱ្យចូលរួមប្រើប្រាស់ប្រាក់រៀលឱ្យបានកាន់តែទូលំទូលាយ ដើម្បីលើកកម្ពស់រូបីយប័ណ្ណជាតិ ។ លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា បានអំពាវនាវដូចនេះនៅក្នុងឱកាសដែលលោកស្រីទទួលពានកិត្តិយស សហគ្រិនសាធារណៈឆ្នើមឆ្នាំ ២០២១ ពីសមាគមសហគ្រិនវ័យក្មេងកម្ពុជា កាលពីថ្ងៃទី ៤ ខែមីនាកន្លងមកនេះ ។
~
~
នៅក្នុងពេលវិបត្តិសង្គ្រាមនៅអ៊ុយក្រែននេះ មានការបារម្ភថា នឹងមានផលប៉ះពាល់ដល់សេដ្ឋកិច្ចពិភពលោក និងសេដ្ឋកិច្ចកម្ពុជាផងដែរ នៅក្នុងនោះដែលបណ្តាលធ្វើឱ្យប្រេងសាំងឡើងថ្លៃជាដើម ។ ប្រេងសាំងឡើងថ្លៃ ត្រូវបានគេបារម្ភថា នឹងនាំឱ្យតម្លៃទំនិញ និងសេវាកម្មជាច្រើនឡើងថ្លៃដែរនាំឱ្យមានអត្រាអតិផរណាខ្ពស់ ។ទោះយ៉ាងណា ធនាគារជាតិនៃកម្ពុជា បានអះអាងថា ខ្លួនបានរក្សាលំនឹងអត្រាប្រាក់រៀលបានល្អនៅក្នុងបរិបទកូវីដ ១៩ នេះ ធៀបនឹងប្រាក់ដុល្លារ នៅពេលកន្លងមកនេះ ទោះបីកម្ពុជា និងសកលោកបានជួបវិបត្តិកូវីដ ១៩ នោះក្តី ។ នៅក្នុងកិច្ចប្រជុំគោលនោយបាយរូបិយវត្ថុលើកទី ៥៨ កាលពីដើមខែមីនានេះ ធនាគារជាតិនៃកម្ពុជា បានបញ្ជាក់ថា ការបើកប្រទេសឡើងវិញរបស់រដ្ឋាភិបាលក្រោយពីវិបត្តិកូវីដ ១៩ បានផ្តល់ភាពជាវិជ្ជមានដល់សកម្មភាពសេដ្ឋកិច្ចក្នុងស្រុក ដែលរួមមានការដឹកជញ្ជួន ពាណិជ្ជកម្ម និងទេសចរណ៍ជាដើមស្របពេលដែលសេដ្ឋកិច្ចកិច្ចពិភពលោកបន្តទទួលបានកំណើន ។
~
~
~
ធនាគារជាតិនៃកម្ពុជា បានបញ្ជាក់ថា អត្រាអតិផរណាបន្តស្ថិតក្នុងកម្រិតទាបអាចគ្រប់គ្រងបានក្នុងអត្រា ៣% ជាមួយនឹងស្ថេរភាពអត្រាប្តូរប្រាក់ ៤ ១០៨ រៀលក្នុង ១ ដុល្លារអាមេរិក ។ ទុនបម្រុងអន្តរជាតិបន្តមានកម្រិតខ្ពស់គ្រប់គ្រាន់ដែលស្មើនឹង ៨ ខែ នៃការនាំចូលទំនិញ និងសេវាសម្រាប់គ្រាបន្ទាប់សម្រាប់បម្រើដល់ការអនុវត្តនយោ បាយវិត្ថារកម្ម និងគាំទ្រដល់សកម្មភាពសេដ្ឋកិច្ចខណៈដែលបន្តរក្សាបានស្ថិតភាពរឹងមាំក្នុងវិស័យធនាគារ ។
~
~
គួរជម្រាបថា កម្ពុជាជាប្រទេសដែលចាយវាយ ទូទាត់ប្រាក់ដុល្លារ ឬគេហៅថា ដុល្លាររូបនីយកម្ម ។ តម្លៃទំនិញនាំចេញចូលនាំចេញ និងលើទីផ្សារភាគច្រើនត្រូវគិតជាដុល្លារ ។ យោងតាមមូលនិធិរូបិយវត្ថុអន្តរជាតិ (IMF) កាលពីពេលកន្លងមកនៅកម្ពុជា ដុល្លារត្រូវបានប្រើប្រាស់រហូតទៅដល់ប្រមាណជា ៨០% នៃបរិមាណសាច់ប្រាក់សរុប ដែលចរាចរនៅលើទីផ្សារ ។
~
~
នៅក្នុងសេចក្តីប្រកាសព័ត៌មានរបស់ធនាគារជាតិកម្ពុជាកាលពីថ្ងៃទី ១ ខែមីនា នោះ បានបញ្ជាក់ថា ដើម្បីរួមចំណែករក្សាស្ថិរភាពថ្លៃ និងលើកកម្ពស់ប្រសិទ្ធនយោបាយរូបិយវត្ថុសម្រាប់គ្រាបន្ទាប់គណៈកម្មាធិការនយោបាយរូបិយវត្ថុ បានសម្រេចលើជំហរនយោបាយរូបវត្ថុដូចជាបន្តរក្សាស្ថិរភាពអត្រាប្តូរប្រាក់រៀលធៀបនឹងដុល្លារអាមេរិក ដោយប្រើប្រាស់ឧបករណ៍ផ្សេងៗរួមទាំងការធ្វើអន្តរាគមន៍ និងការបញ្ចេញសន្ទនីយភាពជាប្រាក់រៀលជាដើម ៕ ប្រភព៖ កោះសន្តិភាព
~
~
~
~
