Thursday, September 29, 2022
Google search engine
Homeចំណេះដឹងឈប់​យល់​ច្រឡំ​! ខេត្តក្រចេះ​មិនមែន​មក​ពី​រៀន «​មិន​ងាយ​ចេះ​ទេ​» តែ​មក​ពី​រុក្ខជាតិ​ម្យ៉ាង​នេះឯង​!

ឈប់​យល់​ច្រឡំ​! ខេត្តក្រចេះ​មិនមែន​មក​ពី​រៀន «​មិន​ងាយ​ចេះ​ទេ​» តែ​មក​ពី​រុក្ខជាតិ​ម្យ៉ាង​នេះឯង​!

ភ្នំពេញ ៖ ក្រចេះ ជា​ឈ្មោះ​ខេត្ត​មួយ​របស់​ប្រទេស​កម្ពុជា ដែល​ស្ថិត​នៅ​ប៉ែក​ឦសាន​នៃ រាជធានី​ភ្នំពេញ​។ វា​មាន​ព្រំប្រទល់​ជាប់​នឹង​ស្ទឹង​ត្រែង​នៅ​ភាគ​ខាងជើង មណ្ឌល​គី​រី​នៅ​ខាងកើត កំពង់ធំ និង កំពង់ចាម​នៅ​ខាងលិច ហើយ​ត្បូងឃ្មុំ និង​វៀតណាម​នៅ​ខាងត្បូង​។

កន្លង​មក មាន​បងប្អូន​យើង​ខ្លះ​បាន​ចំអន់​គ្នា​លេង​ថា ខេត្ត​តូច​ច្រឡឹង​មួយ​នេះ មានឈ្មោះ​ថា ក្រចេះ ព្រោះ​មក​ពី​អ្នក​ខេត្ត​នេះ គឺ «​រៀន​មិន​ងាយ​ចេះ​» ។ តែ​ការ​ពិត គឺ​ខេត្តក្រចេះ មានឈ្មោះ​បែប​នេះ ដោយសារ​តែ​ជាប់​ពាក់ព័ន្ធ​នឹង​រុក្ខជាតិ​ម្យ៉ាង​ឈ្មោះ​ថា «​ក្រចេះ​» ។

ដើម​ក្រចេះ ជា​រុក្ខជាតិ​ម្យ៉ាង​មាន​ក្លិនក្រអូប​ស្រ​ដៀង​នឹង​ដើម ចន្ទន៍ ក្រស្នា ដែល​មនុស្ស​សម័យ​ដើម​និយម​យក​មក​ធ្វើ​ជា​គ្រឿងសម្អាង​កាយ ម្សៅលាបមុខ ថ្នាំសង្កូវ ធូបក្រអូប​ប្រេង​ក្រចេះ​ជាដើម​។ ខេត្តក្រចេះ ដែល​មនុស្ស​ភាព​ច្រើន​តែង​និយម​មក​និយាយ​លេង​ថា ពាក្យ​ក្រចេះ​បាន​មក​ពី​រៀន​មិន​ងាយ​ចេះ តាម​ពិត​ទៅ​ក៏​មាន​ប្រវត្តិ​ពាកព័ន្ធ​ជាមួយ​ដើម​ក្រចេះ​ចួ​ង​ចន្ទន៍​នេះ​ដែរ​។

យោង​ទៅ​តាម​ឯកសារ​មួយ​ចំនួន​ដែល​បាន​មក​ពី​ក្រុម​ស្រាវជ្រាវ​ជីវៈចម្រុះ​កម្ពុជា​បាន​បង្ហាញ​ប្រាប់​ពី​ប្រ​វត្ត​ខ្លះ​ៗ​របស់​ដើម​ក្រចេះ ដែល​គួរ​ឲ្យ​សោកស្ដាយ​បច្ចុប្បន្ន​ដើម​ក្រចេះ​បាន​ផុត​ពូជ​ទៅ​ហើយ​នៅ​កម្ពុជា​។ ដើម​ក្រចេះ មាន​រូបរាង​ស្រ​ដៀង​ដើម​ក្រសាំង មាន​ផ្កា​រីក​ចាប់ពី​ខែមីនា ដល់​ខែឧសភា ផ្លែ​ខ្ចី​មាន​ពណ៌​បៃតង ប៉ុន្តែ​ពេល​ចាស់​ទៅ​វា​ប្រែជា​ពណ៌​ស្វាយ​ចាស់​។លើស​ពី​នេះ​ទៅ​ទៀត ដើម​ក្រចេះ​ក៏​មាន​អត្ថប្រយោជន៍​ជា​ច្រើន​ជួយ​ទៅ​ដល់​សុខភាព ដែល​មនុស្ស​សម័យ​ដើម​យក​មក​ធ្វើ​ជា​ឱសថ​សម្រាប់​ព្យាបាល​ជំងឺ​មាន​ដូច​ជា ព្យាបាល​ជំងឺ​គ្រុនក្ដៅ បញ្ចុះ​កំ​ដៅ បង្កើន​ចំណង់​អាហារ សន្លាក់ឆ្អឹង រោគ​ពោះវៀន ទល់លាមក និង​ជំនួយ​ក្នុង​ការ​ពន្យា​កំណើត​ជាដើម​។

លោក សុខ វិជ្ជា ជា​អ្នក​ស្រាវជ្រាវ​ផ្នែក​ជីវៈចម្រុះ​កម្ពុជា និង​បាន​សហការ​ជាមួយ​ក្រសួងបរិស្ថាន បាន​មាន​ប្រសាសន៍​ឲ្យ​ដឹង​ថា « តាម​ពិត​ទៅ​ប្រហែល​កាលសម័យ​មុន នៅ​ត្រង់​ម្តុំ​ខេត្តក្រចេះ អាច​មានការ​ជួញដូរ​ម្សៅ​ក្រចេះ​នេះ​ច្រើន ឬ ក៏​មានការ​កា​.​ប់​ឈើ​ក្រចេះ​លក់ ទើប​គេ​ហៅ ខេត្តក្រចេះ​មក​ដល់​សព្វថ្ងៃ ! »​។លោក​បាន​បន្ថែម​ទៀត​ថា «​តាម​ពិត​ទៅ បើ​តាម​ខ្ញុំ​បាន​សិក្សា​លម្អិត ម្សៅ​ក្រចេះ​ចួ​ង​ចន្ទន៍​នេះ ជា​របស់​ត្រកូល​អភិ​យ​វង្ស​បែន ដែល​ជា​ចៅហ្វាយខេត្ត​បាត់ដំបង​នា​សម័យ​មុន ព្រោះ​សព្វថ្ងៃ​ចៅស្រី​បង្កើត​របស់ កថា​ថន​ឈុំ មានឈ្មោះ​ថា ប៉ាក់​ប៊ុ​ន​ថា​ន ស៊ុម​ស្រី​កែវ បាន​យក​រូបមន្ត​ធ្វើ​ម្សៅ​ក្រចេះ​ចន្ទន៍​នេះ មក​ផលិត​សា​ឡើង​វិញ​នៅ​ឯ​ស្រុក​សៀម ! ដូច្នេះ​ហើយ​យើង​អាច​សន្មត់​យ៉ាង​ជាក់លាក់​ហើយ​ថា ម្សៅ​ក្រចេះ​ចួ​ង​ចន្ទន៍​នេះ ពិតជា​មាន​វត្តមាន​ប្រើប្រាស់​នៅ​ស្រុក​ខ្មែរ​សម័យ​មុន​មែន គ្រាន់តែ​យើង​ពុំ​ទាន់​អាច​កំណត់​ពី​សម័យកាល​អោយ​បាន​ច្បាស់លាស់ !»​។

បើ​តាម​ឯកសារ​មួយទៀត​បាន​បង្ហាញ​ថា « ខេត្តក្រចេះ » ជា​ដែនដី​ប្រវត្តិសាស្ត្រ​មួយ​ក្នុង​កម្ពុជរដ្ឋ​នៃ​យើង តាំងពី សម័យ​ចេ​ន​ឡា​មក​ម្ល៉េះ ដោយហេតុ​ថា « ស្រុក​សំបូរ » ដែល​ស្ថិត​នៅ​តាម​ដង​ទន្លេមេគង្គ គឺជា​អតីត​រាជធានី នៃ « ចេ​ន​ឡា ទឹក លិច​» មានឈ្មោះ​ថា « ក្រុង​ស​ម្ភុ​បុ​រៈ​»! តាម​ពាក្យ​របស់​ព្រឹទ្ធាចារ្យ​នៅ​តំបន់​នោះ​ក៏​ដូច​ជា​តាម​ឯកសារ​មួយ​ចំនួន​បាន​បង្ហាញ​ថា «​ក្រចេះ​» គឺជា​ពាក្យ​ក្លាយ​ពី​ភាសា​បារាំង​ថា GATILLE ( ហ្គា​ទី​ឡេ ) ដោយ​អ្នកបកប្រែ​ឱ្យ​អាជ្ញាធរ​បារាំង​ពេល​នោះ​និយាយ​ពុំ​ត្រូវ​តាម​ភាសា​បារាំង​នាំ​ឱ្យ​ពាក្យ GATILLE( ហ្គា​ទី​ឡេ ) នោះ​ក៏​ក្លាយជា ពាក្យ «​ក្រចេះ​» ។

ឯកសារ​ប្រវត្តិសាស្ត្រ​នោះ បញ្ជាក់​ថា ដោយ​មានការ​បះបោរ​ប្រឆាំង​នៃ​ជនជាតិ​ព្នង​ចំពោះ​បារាំង នា​សម័យ​នោះ​ពួក បារាំង​បាន​ចាត់​កងកម្លាំង​បញ្ជូន​ទ័ព និង​ចាត់​លោក GATILLE ឱ្យ​ផ្គត់ផ្គង់​សម្ភារៈ​សឹក​ភ័ស្តុភារ និង​បោះទីតាំង​មូលដ្ឋានទ័ព​នៅ​ចំ​ក្រុង​ក្រចេះ​សព្វ​ថ្ងៃនេះ ។ មូលដ្ឋានទ័ព​នោះ គេ​ឱ្យឈ្មោះ​ថា CAMP LOGISTIQUE DE GATILLE មាន​ន័យ​ជា​ខេមរភាសា​ថា ជំរំ GATILLE ។ ដូច្នេះ​ហើយ​ទើប​មាន​អ្នកខ្លះ​យល់​ថា ពាក្យ​ក្រចេះ​នេះ​យក​តាម​ឈ្មោះ​មេទ័ព​បារាំង GATILLE នេះ ! តែ​ទោះជា​យ៉ាងណា ក៏​វា​ពុំ​អាច​ជា​រឿង​សម​ហេតុផល​ដែល​ថា ខេត្តក្រចេះ​ជា​ឈ្មោះ​ហៅ​ច្រឡំ​ពី​បារាំង​ដែរ ៕ កោះសន្តិភាព

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine
Google search engine
Google search engine
Google search engine

Most Popular

Recent Comments