ស្គាល់អត្តសញ្ញាណខ្មាន់កាំភ្លើង ដែលបា.ញ់លោក អាប៉េ គឺជាអតីតទាហានជើងទឹកជប៉ុន
ទីក្រុងណារ៉ា ៖ ប៉ូលិសបានចាប់ខ្លួនបុរសម្នាក់ ពីបទប៉ុនប៉ងមនុស្សឃា.ត លើអតីតនាយករដ្ឋមន្ត្រីជប៉ុន លោក ស៊ីនហ្សូ អាបេ (Shinzo Abe) កាលពីថ្ងៃសុក្រ ទី០៨ ខែកក្កដា ឆ្នាំ២០២២ (ម៉ោងប្រហែល ១១និង៣០នាទី ម៉ោងក្នុងស្រុក) ខណៈពេលលោកកំពុងថ្លែងសុន្ទរកថា នៅទីក្រុងណារ៉ា ភាគខាងលិចប្រទេសជប៉ុន ។ប៉ូលិសបានចាប់ខ្លួនជនសង្ស័យឈ្មោះ Yamagami Tetsuya អាយុ៤១ឆ្នាំ ជាអ្នករស់នៅទីក្រុងណារ៉ា ជាមួយនឹងកាំភ្លើងដែលរឹបអូសបាននៅកន្លែងកើតហេតុ ទំនងជាកាំភ្លើងកែច្នៃ ។ បុរសនោះ មិនបានព្យាយាមរត់គេចឡើយ ។ ជននេះកំពុងត្រូវបានឃុំខ្លួនបណ្ដោះអាសន្ន នៅអធិការដ្ឋាននគរបាលក្រុង ណារ៉ា នីស៊ី ។
ខ្មាន់កាំភ្លើង ត្រូវបានគេស្គាល់អត្តសញ្ញាណថា ជាអតីតសមាជិកកងទ័ពជើងទឹកជប៉ុន នៃកងកម្លាំងស្វ័យការពារដែនសមុទ្រជប៉ុន ដែលទទួលបន្ទុកការពារប្រជុំកោះ អស់រយៈពេល ៣ឆ្នាំ ហើយបានរំសាយនៅឆ្នាំ២០០៥ នេះបើយោងតាមប្រភពពីក្រសួងការពារជាតិជប៉ុន ។
ប៉ូលិសបាននិយាយថា ខ្មាន់កាំភ្លើងបានសារភាពថា គាត់បានព្យាយាមសម្លា.ប់លោក ស៊ីនហ្សូ អាបេ ដោយសារតែគាត់(ជនសង្ស័យ) “មិនពេញចិត្ត” ជាមួយអតីតនាយករដ្ឋមន្ត្រីជប៉ុនរូបនេះ ។
ទីភ្នាក់ងារសារព័ត៌មាន Kyodo និង NHK បាននិយាយថា លោកអាបេ អាយុ៦៧ឆ្នាំ ហាក់ដូចជាស្ថិតក្នុងស្ថានភាពធ្ងន់ធ្ងរ ពេលបញ្ជូនទៅមន្ទីរពេទ្យ ។
សាក្សីដែលឃើញផ្ទាល់ភ្នែក បាននិយាយថា ពួកគេបានឃើញបុរសម្នាក់ កាន់កាំភ្លើងបា.ញ់ពីខាងក្រោយលោក ស៊ីនហ្សូ អាបេ ។ ការបា.ញ់គ្រាប់ទីមួយ ទំនងជាមិនត្រូវ ប៉ុន្តែការបា.ញ់គ្រាប់ទីពីរ ត្រូវចំលោកអាបេ នៅខាងក្រោយ ។ ភ្លាមៗនោះ លោកអាបេ បានដួលទៅលើដី មានហូរឈាម ដោយលោក “ដឹងខ្លួន និងអាចឆ្លើយតប” មុនពេលបញ្ជូនទៅមន្ទីរពេទ្យ ។ បន្ទាប់មកកងសន្តិសុខបានឃាត់ខ្លួនខ្មាន់កាំភ្លើង ។
លោក អាបេ ដែលជានាយករដ្ឋមន្ត្រី កាន់អំណាចយូរបំផុតរបស់ប្រទេសជប៉ុន បានកាន់តំណែងក្នុងឆ្នាំ ២០០៦ សម្រាប់រយៈពេលមួយឆ្នាំ ហើយបន្ទាប់មកលោកកាន់តំណែងម្តងទៀត ពីឆ្នាំ ២០១២ ដល់ឆ្នាំ ២០២០ មុនពេលចុះចេញពីតំណែង ដោយលើកឡើងពីហេតុផលសុខភាព ។
ការបា.ញ់ប្រហារដោយកាំភ្លើង គឺកម្រមាននៅក្នុងប្រទេសជប៉ុន ដែលកាំភ្លើងដៃ ត្រូវបានហាមប្រាមយ៉ាងតឹងរ៉ឹងបំផុត ។ ក្នុងឆ្នាំ ២០១៤ មានមនុស្សស្លា.ប់ដោយកាំភ្លើង ត្រឹមតែ០៦ករណីប៉ុណ្ណោះ នៅក្នុងប្រទេសជប៉ុន បើប្រៀបធៀបទៅនឹងសហរដ្ឋអាមេរិក មានដល់ ៣៣,៥៩៩ ករណី ៕
