ពិតជាចិត្តសឿងមែន! កាសែតដ៏ល្បីរបស់អាមេរិក ញូយ៉កថាមស៍ បញ្ជាក់ថាខ្លួនមិនត្រូវការបង់លុយថ្លៃជាវសេវាប្រចាំខែពីក្រុមហ៊ុនទ្វីតថឺ ដើម្បីជាថ្នូរនឹងការទទួលបានសញ្ញាបញ្ជាក់អត្តសញ្ញាណ ឬសញ្ញាធីក (verified)។ ខាងលើនេះជាការបញ្ជាក់របស់អ្នកនាំពាក្យញូយ៉កថាមស៍ ដែលធ្វើឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីទំព័រទ្វីតថឺជាផ្លូវការរបស់ញូយ៉កថាមស៍ត្រូវទ្វីតថឺដកសញ្ញាធីកពណ៌ខៀវ។
យោងតាមគោលការណ៍ថ្មី, ទំព័រទ្វីតថឺជាផ្លូវការរបស់អង្គភាពទាំងអស់នៅអាមេរិកបើចង់បានសញ្ញាធីកពណ៌ខៀវ លុះត្រាតែបង់សេវាជាវប្រចាំខែ។ សញ្ញាធីក ឬការបញ្ជាក់អត្តសញ្ញាណ (verified) ជាការទទួលស្គាល់ពីទ្វីតថឺថាជាទំព័រស្របច្បាប់របស់នរណម្នាក់ ឬអង្គភាពណាមួយ។ នេះជាក្បួនរកស៊ីថ្មីរបស់ទ្វីតថឺ។ ស្ថាប័នតូចធំទាំងអស់ដែលមានទំព័រទ្វីតថឺត្រូវបង់លុយ១ពាន់ដុល្លារជារៀងរាល់ខែ។
បន្ទាប់មក, ទ្វីតថឺនឹងចេញសញ្ញាធីកពណ៌មាស។ ចំណែកទំព័រទ្វីតថឺរបស់បុគ្គលម្នាក់ៗអាចបង់៧ដុល្លារជារៀងរាល់ខែ។ ទ្វីតថឺចាប់ផ្ដើមអនុវត្តពីសហរដ្ឋអាមេរិកទៅមុនគេ។ អ្នកខ្លះយល់ថាមិនយូរទេ ទ្វីតថឺគង់តែអនុវត្តនៅប្រទេសដទៃទៀតជាមិនខានឡើយ ព្រោះលោកអ៊ីឡន ម៉ាស់ (Elon Musk) បានចំណាយលុយច្រើនណាស់ដើម្បីសេងយកទ្វីតថឺ ។ ដូច្នេះ ដល់ពេលដែលលោកត្រូវការស្រង់ដើម។
ញូយ៉កថាមស៍ហាក់ដូចជាប្រកាន់គោលជំហរម៉ឺងម៉ាត់ មិនចុះញ៉មតាមគោលនយោបាយរបស់ទ្វីតថឺ។ ជាការពិត, ស្ថាប័នដ៏ធំដូចញូយ៉កថាមស៍ត្រឹមលុយ១ពាន់ដុល្លារក្នុងមួយខែសម្រាប់បង់ឱ្យទ្វីតថឺ គេជឿជាក់ថាញូយ៉កថាមស៍អាចធ្វើបានដោយងាយ។ ប៉ុន្តែញូយ៉កថាមស៍មិនព្រមធ្វើតាមជាដាច់ខាត ដើម្បីកុំឱ្យគេថាខ្លួនចុះចាញ់តាមការដាក់សម្ពាធពីខាងក្រៅ។
អ្នកខ្លះវិភាគឃើញថាប្រហែលជាដោយសារការកាច់កុងគ្នាខាងនិន្នាការនយោបាយផងក៏មិនដឹង។ លោកអ៊ីឡនម៉ាស់ធ្លាប់ប្រកាសក្ដែងៗថាលោកគាំទ្របក្សសាធាណរដ្ឋ។ ចំណែកញូយ៉កថាមស៍ត្រូវគេដឹងជាប្រពៃណីមកហើយថាជាសារព័ត៌មានដែលមាននិន្នាការខាងឆ្វេង និងកាន់ជើងបក្សប្រជាធិបតេយ្យ។ ញូយ៉កថាមស៍បញ្ជាក់ថាសូម្បីតែទំព័រទ្វីតថឺរបស់បុគ្គលិកខ្លួនក៏ខ្លួនមិនត្រូវការចំណាយលុយមួយកាក់មួយសេនដែរ។
លើកលែងតែនៅក្នុងករណីចាំបាច់ដែលជៀសមិនរួច។ បើមិនបង់សេវាប្រចាំខែខ្លាចបង្ហោះអត្ថបទអត់ចេញ។ ឥឡូវនេះ មិនត្រឹមតែញូយ៉កថាមស៍ទេ, កម្មវិធីនយោបាយរបស់លោកអ៊ីឡនម៉ាស់ក៏មានបញ្ហាសម្រាប់ស្ថាប័នសារព័ត៌មានដទៃទៀតផងដែរ។ គេហទំព័រផូលីទីកូ (Politico) ប្រកាសថាខ្លួនក៏មិនបង់សេវាប្រចាំខែទៅឱ្យទ្វីតថឺទេ។ ចំណែកទ្វីតថឺរបស់បុគ្គលិកខ្លួនក៏ខ្លួនមិនបង់ប្រចាំខែដើម្បីទទួលបានសញ្ញាធីកពណ៌ខៀវដែរ។ នេះបើយោងតាមលិខិតអនុស្សារ ឬមេមម៉ូ(memo)ដែលផូលីទីកូបញ្ជូនទៅគ្រប់បុគ្គលិករបស់ខ្លួន។
ទ្វីតថឺធ្លាប់បានប្រកាសតាំងពីមុននេះមកម៉្លេះថាចាប់ពីថ្ងៃទី១ ខែមេសាតទៅ, ទំព័រទ្វីតថឺរបស់បុគ្គល និងទ្វីតថឺរបស់ស្ថាប័ននានាអាចនឹងបាត់សញ្ញាធីកជាបណ្ដើរៗ ព្រោះក្រុមហ៊ុនចាប់ផ្ដើមអនុវត្តគោលការណ៍ថ្មី។ តាមដឹងមកថាសូម្បីតែសេតវិមានក៏សម្រេចចិត្តមិនបង់លុយប្រចាំខែឱ្យទ្វីតថឺទេ។ សេតវិមានសុខចិត្តឱ្យទ្វីតថឺដកសញ្ញាធីកពណ៌ខៀវចេញពីទំព័ររបស់បុគ្គលិកខ្លួនក៏ដកទៅចុះ៕
