~
បុរសជនជាតិប៉ូឡូញម្នាក់ ដែលមានមុខមាត់ស្រដៀងខ្លាំងនឹងប្រធានាធិបតីរុស្ស៊ី លោក Vladimir Putin បានសារភាពថា គាត់កំពុងបារម្ភខ្លា.ចចំពោះសុវត្ថិភាពផ្ទាល់ខ្លួន ចំពេលដែលរុស្ស៊ីកំពុងបន្តសង្គ្រាមបង្ហូរឈា.មឈ្លានពានលើអ៊ុយក្រែន។
~
~
លោក Slawek Sobola ជឿថា ប្រជាជនអ៊ុយក្រែន និងក្រុមបាតុករប្រឆាំងនឹងសង្គ្រាមរបស់រុស្ស៊ី ដែលមានមូលដ្ឋានក្នុងប្រទេសប៉ូឡូញ អាចនឹងជះកំហឹងមកលើរូបគាត់។ បុរសវ័យ៥៣ឆ្នាំ មកពីទីក្រុង Wroclaw ប្រទេសប៉ូឡូញ បាននិយាយថា គាត់មានអារម្មណ៍តានតឹងចាប់តាំងពីប្រធានាធិបតីរុស្ស៊ីបានប្រកាសចាប់ផ្តើមប្រតិបត្តិការយោធាពិសេសលើអ៊ុយក្រែន កាលពីសប្តាហ៍មុន។ ហើយឥឡូវនេះ គាត់កំពុងបារម្ភថា អ្នកស្រុក និងជនភៀសខ្លួនអាចកំណត់គោលដៅមកលើគាត់។ ដោយសារតែគាត់មានមុខមាត់ស្រដៀងខ្លាំងនឹងលោកពូទីន ដែលពួកគេហៅទាំងកំហឹងថា មេដឹកនាំស្រែកឃ្លានសង្គ្រាម។
~
~
លោក Slawek បានប្រាប់កាសែត Daily Star ថា «មុនសង្គ្រាម ខ្ញុំមិនបារម្ភពីសុវត្ថិភាពខ្ញុំនៅទីសាធារណៈនោះទេ។ ប៉ុន្តែពេលដែលលោកពូទីនដាក់បញ្ជាវាយប្រហារលើអ៊ុយក្រែន ខ្ញុំមានការភ័យខ្លាចបន្តិច ព្រោះក្នុងទីក្រុង Wroclaw មានមនុស្សច្រើនណាស់មកពីអ៊ុយក្រែន ធ្វើការ និងរស់នៅទីនេះ»។
~
លោកបន្តថា «មានច្រើនដងដែលពួកគេប្រាប់ខ្ញុំថា ខ្ញុំមើលទៅដូចពូទីន។ ហើយឥឡូវនេះ ដោយសារតែសង្គ្រាម ខ្ញុំខ្លាចថាមនុស្សទាំងនោះ អាចខឹង ឬឆេវឆាវនៅពេលពួកគេឃើញខ្ញុំ»។
លោក Slawek បច្ចុប្បន្នរស់នៅជាមួយប្រពន្ធគាត់ដែលមានឈ្មោះ Dorota និងបានបើកក្រុមហ៊ុនដឹកជញ្ជូន ហើយគាត់ធ្លាប់និយាយថា គាត់រកប្រាក់ចំណូលបានច្រើន ដោយសារតែគាត់ដូចលោកពូទីន ដែលជាបុរសខ្លាំង និងល្បីបំផុតម្នាក់របស់ពិភពលោក៕ (ដកស្រង់ចេញពី The Sun)
