ភ្នំពេញ​៖ ​ថ្មីៗនេះលោក​ឧបនាយក​រដ្ឋមន្ត្រី​ ជា​ សុ​ផា​រ៉ា​ រដ្ឋមន្ត្រី​ក្រសួង​រៀបចំ​ដែនដី​ នគរូបនីយកម្ម​ និង​សំណង់​ បាន​ប្រកាសប្រាប់​ដល់​ឧកញ៉ា​ធំ​ៗនៅក្នុង​ប្រទេស​កម្ពុជា​ រួម​ជាមួយនឹង​អ្នករក​ស៊ី​វិស័យ​អចលនទ្រព្យ​កុំឱ្យ​មានការ​ព្រួយបារម្ភ​ខ្លាំង​ចំពោះ​​ការ​ចេញ​របស់​ជនជាតិ​ចិន​​ពី​ប្រទេស​កម្ពុជា​ ក្រោយរាជ​រដ្ឋាភិបាល​ចេញ​បំរាម​បិទ​ល្បែង​អន​ឡា​ញនៅ​ចុងខែ​សីហា​​ កន្លងទៅនេះ។

យោង​តាម​សារព័ត៌មាន​ក្នុង​ស្រុក​មួយ​ ដែល​បាន​ស្រង់​សំដី​របស់​លោក​ឧបា​នយ​ករ​ដ្ឋ​មន្ត្រី​ ជា​សុ​ផា​រ៉ា​ នៅក្នុង​កិច្ចប្រជុំ​ក្រុមការងារ​ទី១៣​ “សំណង់​ និង​អចលនទ្រព្យ​” នៃ​វេទិកា​រាជរដ្ឋាភិបាល​-ផ្នែកឯកជន​ កាលពី​ម្សិល​នេះ​ថា​ កុំឱ្យ​មានការ​ជឿ​ផ្ដេសផ្តាស់​នៃ​ការ​ស្ងាត់​នៃ​ជនជាតិ​ចិន​ ដែល​កំពុង​រកស៊ី​នៅក្នុង​ប្រទេស​កម្ពុជា​ អ្នក​ដែល​ចាកចេញ​ពី​ប្រទេស​កម្ពុជា​គឺ​ពួក​អ្នកលេង​ល្បែង​អន​ឡាញ​ធ្វើ​ព្យុះ​ ធ្វើ​ភ្លៀង​ទេ​។

លោក​ឧប​យក​រដ្ឋមន្ត្រី​ ជា​សុ​ផា​រ៉ា​ បន្ត​ថា​ “… ឃើញ​គេ​ថា​ ពេលនេះ​ រាង​ស្ងាត់​បន្តិច​! តែ​កុំទៅ​ជឿ​ស្ងាត់​! ឲ្យ​នឹងន​ចិត្ត​បន្តិច​ទៅ​។ អា​ពួក​អន​ឡាញ​ ( ចិន​ ) វា​ឲ្យ​កូនចៅ​វា​ចេញ​សិន​ទេ​។ វាពន្យួ​សយើង​ថា​ បើ​បិទ​អន​ឡាញ​! កំពង់សោម​ស្ងាត់​! កុំទៅ​ជឿ​”។

លោក​ឧបនាយក​រដ្ឋមន្ត្រី​បន្ត​ថា​ “ឧក​ញ៉ាៗ​ ចូលរួម​ប្រជុំ​នេះ​ ទាំងអស់​នេះ​ អត់​បាន​លុយ​ពី​អន​ឡាញ​ទេ​! មែនទេ​? អីចឹង​ អ្នក​អន​ឡាញ​ មុន​មានរឿង​ ថា​ជា​រឿង​កំប៉ិកកំប៉ុក​! ដល់ពេល​បិទ​ថា​ ថា​រឿង​ធំ​។ ក្នុង​ផែនការ​ យកពន្ធ​ ៧០លាន​ដុល្លារ​ តែ​ដល់​ជាក់ស្តែង​បានតែ​ ៩លាន​។ ដល់ពេល​បិទ​ ថា​ពន្ធ​បាន​ដល់​ ១០០លាន​ដុល្លារ​។ ឥឡូវ​វា​ស្ងាត់​! ស្ងាត់​តែ​ប៉ុណ្ណឹង​! ឥឡូវ​សួរ​ថា​ ផ្ទៃដី​ ១៨១​ ០៣៥​ គីឡូម៉ែត្រ​ការ៉េ​ … កន្លែង​ដទៃទៀត​ គេ​ទៅ​មិនកើត​! បាន​ជា​គេ​មក​កម្ពុជា​នេះ​។ អីចឹង​ បងប្អូន​ឃើញថា​ ស្ងាត់​! តិច​ទៅ​លក់​ដី​ឲ្យ​គេ​! ល្មម​! តិច​ថា​ មក​គិ​កៗ​ តាំង​ទៀត​… ទីបំផុត​ ផលប្រយោជន៍​ទាំង​តូច​ទាំង​ធំ​ ឧកញ៉ា​ លី​ហួរ​ អត់​លី​ ទៅវិញ​ទៀត​!”។

ជុំវិញរឿងនេះ លោក​ ឃាង​ ពុទ្ធី​ ប្រធាន​សមាគម​អ្នកជំនាញ​អចលនទ្រព្យ​កម្ពុជា​ បានឱ្យ​ដឹង​ដែរ​ថា​ការ​ចេញ​របស់​ជនជាតិ​ក្នុងរយៈពេល​ប៉ុន្មាន​ថ្ងៃ​កន្លងមក​នេះ​ ក្រោយពេល​រដ្ឋាភិបាល​បិទ​លេងល្បែង​អន​ឡាញ​ គឺ​ពុំ​មាន​ប៉ះពាល់​វិស័យ​សេដ្ឋកិច្ច​កម្ពុជា​ឡើយ​ តែ​វា​អាច​ប៉ះ​ពល់​ដល់​វិស័យ​អចលនទ្រព្យ​ក្នុងរយៈពេល​ខ្លី​ ពោល​អាច​ ពី៣ខែ​ ទៅ​ ៦ ខែ​ប៉ុណ្ណោះ​។

តែ​យ៉ាងណាក៏ដោយ​ លោក​ថា​ បើ​មិន​មាន​អ្នក​វិនិយោគិន​ចិន​ ក៏​កម្ពុជា​មាន​ភ្ញៀវ​ ឬអ្នក​វិ​និ​យោ​គផ្សេង​ៗទៀត​ដូចជា​អ្នក​វិនិយោគ​ខ្មែរ​ និង​អឺ​រ៉ុប់​ ដែល​ពួកគេ​នៅតែ​ត្រូវការ​ច្រើន​លើ​វិស័យ​អចលនទ្រព្យ​នេះ​ ចំណែក​ជនជាតិ​ចិន​ដែល​រកស៊ី​អន​ឡា​ញនៅ​ក្នុង​ប្រទេស​កម្ពុជា​ភាគច្រើន​គឺ​ពុំ​មានច្បាប់​នោះ​ទេ​។

លោក​ប្រធាន​រូប​នេះ​ ក៏បាន​អំពាវនាវ​ អោយ​ប្រជាពលរដ្ឋ​ទាំងអស់​កុំ​មានការ​ព្រួយបារម្ភ​ចំពោះ​ការ​ចាកចេញ​របស់​ជនជាតិ​ចិ​នេះ​ ដោយ​ខិតខំ​ប្រែង​ប្រកបមុខរបរ​របស់​ខ្លួន​ដែល​មាន​បច្ចុប្បន្ន​ទៅ​បាន​ហើយ​។

គួររំលឹកថា៖ សម្តេច​នាយក​រដ្ឋមន្រ្តី​ ហ៊ុន​ សែន​ កាលពី​ថ្ងៃទី​ ១៨​ ខែសីហា ​បាន​ចេញ​សេចក្តី​ណែនាំ​ហាមប្រាម​រាល់​ការ​លេងល្បែង​តាម​អិន​ធើ​ណេត​ និង​ល្បែងស៊ីសង​នៅក្នុង​ប្រទេស​កម្ពុជា​ក្នុង​គោលបំណង​ការពារ​សន្តិសុខ​ និង​សណ្តាប់​ធ្នាប់​សាធារណៈ​ បទបញ្ជារដ៏តឹងរ៉ឹងនេះ បាន​ធ្វើ​ឱ្យ​ជនជាតិ​ចិន​រាប់​ម៉ឺន​នាក់​កំពុង​ចាកចេញ​ពី​ប្រទេស​កម្ពុជា​៕

LEAVE A REPLY

Please enter your comment!
Please enter your name here